Այս տարվա փետրվարին Մինսկի պայմանագրերի ստորագրումից հետո Ուկրաինայի արևելքում ավելի քան 400 մարդ է զոհվել: BBC-ի փոխանցմամբ՝ այս մասին հայտարարել է քաղաքական հարցերով ՄԱԿ-ի գլխավոր քարտուղարի տեղակալ Ջեֆրի Ֆելտմանը:
Ուրբաթ օրը գումարվել է ՄԱԿ-ի Անվտանգության խորհրդի արտակարգ նիստ՝ կապված վերջին երկու օրերին Ուկրաինայի արևելքում հակամարտության կտրուկ սրման հետ:
Ֆելտմանի տվյալներով՝ միայն անցյալ չորեքշաբթի Մարյինկայի շրջանում առնվազն 28 մարդ է զոհվել:
«Մենք հետևում ենք անթույլատրելի հակամարտության հետագա խորացմանը կամ հակամարտության գոտու որոշ մասերում ժամանակավոր բռնկումներին»,- ասել է Ֆելտմանը:
«Մենք չենք կարող թույլ տալ այդ սցենարներից ոչ մեկը և պետք է հասնենք հրադադարի պայմանների իրականացմանը»,- ընդգծել է նա:
ՄԱԿ-ի գլխավոր քարտուղարի տեղակալի կարծիքով՝ բռնկված մարտերը հակասում են Մինսկում ստորագրված պայմանագրերին:
