«Հայաստանի էլեկտրական ցանցեր» ընկերության ղեկավար Բիբինը այսօր եկել է Ազգային ժողով և փակ քննարկում ունեցել ՀՀԿ-ական խմբակցության հետ: Հասկանալի է, որ քննարկումը վերաբերել է էլեկտրաէներգիայի և ընդհանրապես էներգետիկ համակարգի շուրջ առաջացած իրավիճակին, սակայն թե հատկապես ինչ են քննարկել Բիբինն ու պատգամավորները՝ այնքան էլ հայտնի չէ: Սակայն երևի նույնիսկ կարևոր էլ չէ, քանի որ փակ քննարկումն ինքնին արդեն ամեն ինչի մասին խոսում է:
Այդ ինչի՞ց էին վախենում ՀՀԿ-ական պատգամավորները կամ Բիբինը, որ խուսափում էին բաց հարցուպատասխանից, բաց քննարկումներից և որոշել են նախ՝ փակ ռեժիմով հասկանալ իրար: Իսկ այն, որ խոսքը հենց միմյանց հասկանալու մասին է՝ կասկածից վեր է:
Խնդիրն այն է, որ «Հայաստանի էլցանցերը» ըստ էության դարձել է այն «դանայան տակառներից», որոնք Հայաստանում փող ու ռեսուրսներ են կլանել պետական թողտվության և նույնիսկ հովանավորության պայմաններում: Այսօր, սակայն, իրավիճակը հանգել է ճգնաժամի, և առաջացել է մի իրողություն, երբ այդ ճգնաժամը պետք է ինչ-որ մեկի վրա դուրս գրել: Հրապարակայնորեն ընտրվել է այդ ինչ-որ մեկը՝ դա Հայաստանի Հանրապետության քաղաքացիներն են: Որոշվել է, որ էլեկտրաէներգիան կթանկացնեն, որպեսզի իրավիճակը հանգուցալուծվի: Սակայն քաղաքացիները պատրաստվում են դիմադրել, և այս իրավիճակում իրադարձությունները կարող են անկանխատեսելի զարգացում ունենալ:
Իշխանությունները առայժմ փորձում են երկու տարբերակ՝ մեկը հայտարարությունները, որ թանկացում լինելու է, սակայն ոչ այնքան, ինչքան ցանցերն են ուզում: Սրանով երևի թե հաշվարկում են, որ հասարակությունը կարող է մեղմել իր դժգոհությունը, և մեծ պայթյուն տեղի չի ունենա: Մյուս տարբերակն այն է լինելու, որ փորձ է արվելու տարատեսակ քաղաքական դեսանտ ներդնել քաղաքացիների պայքարի մեջ և այդպիսով պայքարը տանել իշխանությունների համար ձեռնտու հունով և հասցնել մոտավորապես այն ավարտին, որին հասավ «ԴԵՄ ԵՄ» շարժումը նույն տեխնոլոգիային ենթարկվելու արդյունքում՝ ինչ-որ խնդիր լուծվեց, սակայն ոչ ամբողջը և ոչ հիմնավոր կերպով:
Սակայն բացառված չէ, որ այս տարբերակներն էլ չաշխատեն, քանի որ քաղաքացիները ի վերջո հասունանում են, և ամեն անգամ ավելի դժվար է նրանց մանիպուլյացիաների ենթարկելը: Եվ ահա այստեղ առաջանում է, իհարկե, իրար հասկանալու անհրաժեշտություն՝ այսպես ասած, հետո իրարից չնեղանալու համար:
Բանն այն է, որ եթե երկու տարբերակներից ոչ մեկն էլ չաշխատի, ապա չի աշխատի քաղաքացիների վրա ամեն ինչ դուրս գրելու որոշումը, և կստացվի, որ քաղաքացիները չեն լինի այն ինչ-որ մեկը, որը պետք է պատասխան տա կատարվածի համար: Այդ դեպքում այդ ինչ-որ մեկը կամ պետք է լինի Բիբինը, կամ պետք է լինեն Հայաստանի իշխանությունները, որոնք տվյալ դեպքում հանդես են գալիս ՀՀԿ-ի պատգամավորական խմբակցության դեմքով:
Այսօր Ազգային ժողովում տեղի ունեցած փակ հանդիպման առանցքում ըստ էության հենց սա է՝ ով պետք է պատասխան տա, եթե չաշխատի բեռը քաղաքացիների վրա դնելու տարբերակը:
