«Բարգավաճ Հայաստան» կուսակցությունը Աբովյանում պաշտպանելու է Վահագն Գևորգյանի թեկնածությունը: «Իսկ Արտաշատում մենք ամեն կերպ պաշտպանելու ենք, որ տեղի ունենան ազատ, արդար և թափանցիկ ընտրություններ: Արտաշատի քաղաքացիներն ում իրենց ձայնը կտան, ըստ այդմ էլ՝ մենք ուզում ենք, որ քվեն իր նպատակին ծառայի»,- «Առաջին լրատվական»-ի հետ զրույցում ասաց ԲՀԿ խմբակցության պատգամավոր Վահե Էնֆիաջյանը:
Վերջինս կարևորեց, որ Տեղական ինքնակառավարման մարմիններում արդեն սերնդափոխություն է տեղի ունենում, և երիտասարդ թեկնածուներ են առաջադրվում: Աբովյանում՝ Վ. Գևորգյանը, Արտաշատում՝ Արգամ Աբրահամյանը. երկուսն էլ երիտասարդ թեկնածուներ են:
Հարցին՝ բայց արդյոք սերնդափոխությանը զուգահեռ չի՞ լուծվում նաև ժառանգականության հարցը. չէ՞ որ Ա. Աբրահամյանը վարչապետ Հովիկ Աբրահամյանի որդին է, Վ. Էնֆիաջյանը խուսափեց ուղիղ պատասխանից: «Մենք պետք է կարողանանք մեր երկրում այնպիսի ընտրություններ կազմակերպել, որը կարտացոլի մեր հասարակության պահանջը»,- ասաց Վ. Էնֆիաջյանը:
Իսկ այն հանգամանքը, որ ԲՀԿ-ն Աբովյանում պաշտպանում է իր նախկին ղեկավար Գագիկ Ծառուկյանի թեկնածուին, դա չի՞ նշանակում, որ այդ կուսակցությունն ու Ծառուկյանը լուռ համագործակցում են. չէ՞ որ Վ. Գևորգյանը համարվում է Գ. Ծառուկյանի առաջադրած թեկնածուն, եղել է Ծառուկյանի օգնականը: «Ես նման տեղեկություն չունեմ: Ես նման տեղեկություն չեմ կարող հրապարակել»,- պատասխանեց Վ. Էնֆիաջյանը:
