«Կարծում եմ, որ այս օրերին դոլարի աստիճանական բարձրացումն առանձնապես նոր ռեկորդներ չի սահմանի»,- «Առաջին լրատվական»-ի հետ զրույցում ասաց տնտեսագետ Վիլեն Խաչատրյանը՝ հավելելով, որ նման դատողություններ անելու համար հիմք է ծառայում այն փաստը, որ ռուսական տնտեսությունում այս օրերին դոլարն ու եվրոն անկում են գրանցում:
Իսկ Հայաստանում, տնտեսագետի խոսքով, դոլարի բարձրացումը պայմանավորված է նրանով, որ ապրիլի 24-ին կուրսն իջեցրել էին և դոլար հավաքել: Հիմա փորձ է արվելու դոլարը թանկ գնով վաճառել ու բերել մի միջանկյալ դիրքի: «Այսինքն՝ ընդամենը նման մի երևույթ է տեղի ունենում և վերջ: Այնպես որ՝ դեկտեմբերի զարգացումները հաստատ չեն կրկնվի, ու այս օրերի աստիճական բարձրացումն էլ օրեր անց կդանդաղի: Իմ կանխատեսմամբ՝ դոլարը կմնա 480-ի շրջակայքում՝պլյուս-մինուս 5 դրամ»,- ասաց տնտեսագետը՝ հավելելով. «Եվ հետո՝ միջազգային շուկայում նավթի գները կրկին անկում են ապրել, ինչը ևս ապացուցում է, որ դոլարը ոչ թե ամրապնդելու է իր դիրքերը, այլ որոշակի առումով թուլանալու»:
Հարցին, թե այս օրերի դրամի արժեզրկումը կարո՞ղ է նպաստել արտահանման ծավալների աճին, Խաչատրյանը պատասխանեց, որ առանձնապես փոփոխություն չի լինի: Արտահանման ծավալները որոշակիորեն կաճեն, բայց ոչ գնի հաշվին:
«Արտահանման ծավալների նվազումը նշանակում է դոլարի քանակության կրճատում դեպի Հայաստան: Իսկ դա գործոններից մեկն է: Մեր արտադրողները քանակ են արտահանելու, իսկ գնային առումով մեր ապրանքը մրցունակ չի լինի Ռուսաստանում»,- ասաց Խաչատրյանը:
