«Առաջին լրատվական»-ի զրուցակիցն է Հայաստանում Չինաստանի ժողովրդրական հանրապետության արտակարգ և լիազոր դեսպան Թյան Էրլուն:
-Պարոն դեսպան, Հայաստանի և Չինաստանի համագործակցությունն ի՞նչ փուլում է գտնվում: Վերջերս երկու երկրների նախագահների միջև հանդիպում եղավ և մի շարք ոլորտներում համագործակցության համաձայնագիր ստորագրվեց: Դրա արդյունքները գործնականում ե՞րբ կարող ենք տեսնել:
–Պետք է ասեմ, որ Հայաստանի և Չինաստանի միջև համագործակցության դինամիկան շատ լավն է: Մենք շատ լավ քաղաքական համագործակցություն ունենք և որ ամենակարևորն է, փոխադարձ վստահություն կա: Չինաստանը Հայաստանի երկրորդ առևտրային գործընկերն է, շատ լավ է ընթանում հումանիտար համագործակցությունը: Դրա վառ օրինակն է հենց այսօրվա միջոցառումը՝ «Չինարենի կամուրջ» մրցույթը:
Ինչպես նշեցիք, վերջերս պատմական իրադարձություն տեղի ունեցավ՝ Հայաստանի նախագահ Սարգսյանի այցը Չինաստան, որտեղ և ստորագրվեց համատեղ համաձայնագիր մեր հետագա համագործակցության վերաբերյալ, ստորագրվել են համագործակցության կոնկրետ կետեր, և ես կարծում եմ, ապագայում մենք առաջնահերթություն կհամարենք այդ ամենը: Հետագայում ավելի կզարգացնենք առևտրատնտեսական համագործակցությունը, կրթական և մշակութային գործակցությունը:
–Այն, որ Հայաստանը հանդիսանում է Եվրասիական տնտեսական միության անդամ ոչ մի կերպ չի՞ խանգարի հայ-չինական առևտրատնտեսական գործակցությանը:
-Այն, որ Հայաստանը անդամագրվել է Եվրասիական տնտեսական միությանը, ես կարծում եմ` ոչ մի կերպ չի խանգարի Հայաստանի և Չինաստանի հետագա համագործակցությանը, դրանց ամրապնդմանը: Եկեք դուրս գանք այս իրավճակից և փորձենք գտնել շփման նոր կետեր, շփման նոր ուղիներ: Առևտրի ծավալը մեզ մոտ բավականին մեծ է արդեն, դա կարևոր ցուցանիշ է: Մենք պետք է հայ գորընկերների հետ շարունակենք համագործակցությունը նաև ապագայում:
–Պարոն Դեսպան , ասացիք հետագայում իսկ կարելի է՞ մոտավոր ժամկետների մասին խոսել: Երբ կտեսնենք հայ-չինական գործակցության շոշափելի արդյունքները:
-Ես կարծում եմ, որ առաջիկա տարիները շատ լավ ժամանակահատված են՝ համագործակցությունը զարգացնելու համար:Ես բավարարված եմ այս արդյունքներով, համագործակցության այս աստիճանով։ Հենց այս ձեռք բերած լավ հիմքով ու վիճակով կշարունակենք ու անպայման արդյունքը կտեսնենք առաջիկայում:
–Հայ-չինական ռազմական գործակցության մասին ի՞նչ կարող եք ասել: Համաձայնագրի մեջ նշվում է նաև այդ բաղադրիչը: Հայաստանի պաշտպանության նախարարությունը տեղեկություն չի տրամադրում, բայց ունեք արդյո՞ք ինֆորմացիա, հնարավո՞ր է Չինաստանից Հայաստան զենք մատակարարվի:
–Մեր երկրների զինված ուժերի միջև կան ավանդական, նորմալ կապեր, ուժային կառույցները համագործակցում են՝ ոստիկանություն և այլն: Ես կարծում եմ` այդ ամենը կպահպանվի նաև հետագայում, փոխադարձ հետաքրքրություն ներկայացնող համագործակցությունները կշարունակվեն այլ ինֆորմացիա չունեմ:
