Եվս երեք բրիտանական ընկերություններ հայտնվել են իրավապահ մարմինների ուշադրության կենտրոնում՝ կապված Եվրոպայում խանութներ մսի մատակարարման սկանդալի հետ: Ինչպես հայտնի է դարձել հինգշաբթի երեկոյան, ստուգումներն իրականացվել են Լոնդոնի հյուսիսային երկու գործարաններում, ևս մեկ ստուգում էլ՝ Հալլ քաղաքում:
Մեծ Բրիտանիայի մսի չափորոշիչների գործակալությունը ոստիկանության և տեղի իշխանությունների հետ համատեղ ստուգումներ է իրականացրել երեք ընկերությունների շինություններում: Արդյունքում առգրավվել են համակարգիչներ և փաստաթղթեր, ինչպես նաև մսի օրինակներ, որոնք հիմա ուսումնասիրում են:
Ավելի վաղ՝ փետրվարի 12-ին կայացած ստուգումներից հետո Թագավորությունում ձերբակալվել էր երեք մարդ, որոնք, լրատվամիջոցների փոխանցմամբ, կասկածվում են խարդախության մեջ: Այդ ընկերությունների աշխատանքը դադարեցված է:
«Մսի սկանդալը» Եվրոպայում բռնկվել է մի քանի օր առաջ, երբ տավարի մսից պատրաստված արտադրանքում, հայտնաբերվել էր ձիու միս: Նման դեպքեր արդեն գրանցվել են Մեծ Բրիտանիայում, Իռլանդիայում, Իսպանիայում, Լյուքսեմբուրգում, Ռումինիայում, Ֆրանսիայում, Շվեդիայում և Կիպրոսում: