Թուրքիայի նախագահ Ռեջեփ Թայիփ Էրդողանն անդրադարձել է Եվրախորհրդարանի՝ ապրիլի 15-ի լիագումար նիստում Հայոց ցեղասպանության 100-րդ տարելիցի թեմայով քննարկումներից հետո ընդունած Հայոց ցեղասպանության մասին բանաձևին, որով թուրքական կառավարությանը կոչ է արվում ճանաչել հայերի ցեղասպանությունն ու այդ կերպ նպաստել երկու ժողովուրդների միջև խաղաղության վերականգնմանը։ Այս մասին գրում է թուրքական «Սաբահ» թերթը։
«Թուրքիայում, այսպես կոչված, ցեղասպանության ստվեր անգամ չկա։ Եվրախորհրդարանի սույն որոշումը մեզ համար ոչ մի նշանակություն չունի», – ասել է Էրդողանը։
Ավելի վաղ Թուրքիայի ԱԳՆ-ն հայտարարություն էր տարածել ԵԽ-ի ընդունած բանաձևի վերաբերյալ՝ նշելով, որ այն կարող է հանգեցնել Անկարայի և Բրյուսելի միջև հարաբերությունների վատթարացման։ Թուրքիան մեղադրել է Եվրախորհրդարանին այն բանում, որ այն խոչընդոտ է ստեղծում Թուրքիայի և ԵՄ-ի հարաբերությունների զարգացման համար և «ձգտում է հերթական անգամ վերաշարադրել 1915 թվականի իրադարձությունների պատմությունը»։ Համաձայն ԱԳՆ-ի հայտարարության՝ Անկարան «լուրջ չի ընդունում նրանց, ովքեր ընդունել են այդ բանաձևը։
