Մայիսի 5-ին կկայանան Երևանի քաղաքապետի և ավագանու ընտրությունները:
Թե ովքեր կլինեն թեկնածուներն, իհարկե, առայժմ հայտնի չէ, բայց կարևոր է նաև՝ նախագահական ընտրություններից հետո ընդհանրապես կլինի՞ հստակ ձևավորված ընդդիմադիր թեկնածու՝ քաղաքապետի պաշտոնը զբաղեցնելու համար, թե՝ ոչ:
Քաղաքագետների միության նախագահ Հմայակ Հովհաննիսյանն «Առաջին լրատվական»-ի հետ զրույցում կարծիք հայտնեց, որ դա հնարավոր է միայն այն դեպքում, եթե ընդդիմադիր ուժերը՝ մինչև ապրիլի վերջը հասցնեն հզոր ընդդիմադիր ալիք ստեղծել։ Իհարկե, այս դեպքում կարևոր է, թե ինչ հետընտրական զարգացումներ կլինեն գալիք նախագահական ընտրություններից հետո։
«Եթե 2012 թվականի խորհրդարանական ընտրություններից հետո կարևորվեր միասնական շտաբի գործունեությունը հետընտրական շրջանում և ընդդիմությունը կարողանար այդ ձևաչափից օգտվել՝ այդ դեպքում աշնանը նրանք կարող էին հզոր հանրահավաքային ալիք մեկնարկել, այսինքն նախագահական ընտրությունների նախաշեմին ծավալվող ալիք կբարձրացվեր։ Բայց դա տեղի չունեցավ, որովհետև խորհրդարանական ընտրություններից հետո ընդդիմությունը փոխանակ գնար հետընտրական զարգացումների ճանապարհով, ընդդիմադիր դաշտում դիրքավորված «Բարգավաճ Հայաստան» կուսակցությունն իշխանությունների հետ անհաջող սակարկությունների գնաց։ Ասում եմ «անհաջող», որովհետև վարչապետին չհաջողվեց փոխել, և ըստ էության, հետընտրական զագացումների փոխարեն տեղի ունեցավ ձևական մի բան՝ «Բարգավաճ Հայաստանի» դուրս գալը կոալիցիայից, որն անիմաստ էր, որովհետև դա կարող էր իմաստ ունենալ միայն մի դեպքում՝ եթե հետագայում «Բարգավաճ»-ը հանդես գար սեփական թեկնածուով:
Հիմա էլ՝ եթե ընդդիմությունը նախագահական ընտրություններից հետո հզոր հանրահավաքային ալիք չբարձրացնի՝ այդ երկու ամիսների ընթացքում, ապա շանս չի ունենա նաև քաղաքապետի և ավագանու ընտրություններում»,- ասաց քաղաքագետը:
Մեր այն հարցին, թե հնարավո՞ր է նախագահական ընտրություններից հետո լինի ԲՀԿ-ՀԱԿ-ՀՅԴ միավորում, Հմայակ Հովհաննիսյանը պատասխանեց. «Քաղաքապետի ընտրությունները նախագահական ընտրություններ չեն, նույնիսկ խորհրդարանական ընտրություններ չեն: Քաղաքապետի ընտրությունները չեն ենթադրում միասնականություն, դա ընդհանրապես արդյունավետ չէ, դա անհեթեթություն է: Պետք է գործել առանձին՝ ընդդիմադիր հզոր ալիք բարձրացնելով, չգիտեմ՝ բայց ժամանակը կբավարարի, թե՝ ոչ»:
Լուսանկարը՝ PanARMENIAN Photo-ի
