Մեքսիկայի նախագահ Էնրիկե Պենյա Նյետոն հանձնարարել է ձևավորել նախարարների «զբոսաշրջային կաբինետ»: Նախագահը հանձնարարականը տվել է չորեքշաբթի երկրի արևմտյան Նայարիթ նահանգում անցկացված միջոցառման ժամանակ, որը նվիրված էր մինչև 2018 թվականը զբոսաշրջության ոլորտում ազգային քաղաքականության հարցերին: Այս մասին հայտնում է RIA Novosti-ն:
Նախագահն անձամբ կղեկավարի զբոսաշրջային կառավարությունը: Զբոսաշրջության և էկոնոմիկայի նախարարություններին հանձնարարվել է մշակել ծրագիր, որը կապահովի երկրի յուրաքանչյուր առողջարանի մրցունակությունը:
Ծրագրի իրականացման հիմնական բաղադրիչներից է զբոսաշրջիկների անվտանգության ապահովումը: Զբոսաշրջիկները վախենում են այդ երկիր այցելել հանցավորության բարձր մակարդակի պատճառով:
Զբոսաշրջությունն ապահովում է այդ երկրի ՀՆԱ-ի 9 տոկոսը և ստեղծում 2.5 մլն աշխատատեղ այդ ոլորտում, ևս 5 մլն՝ հարակից ոլորտներում:
