«Իրավունք և աջակցություն» հիմնադրամի հիմնադիր անդամ Սյուզան Սիմոնյանն «Առաջին լրատվական»-ին տեղեկացրեց, որ այն, ինչ կատարվում է 100-ամյակն առանց ռեժիմի շարժման անդամների հետ Երևանում, կատարվում է նաև Վանաձորում: Խուզարկել են Հովհաննես Ղազարյանի բնակարանը, նրան բերման ենթարկել, բացի այդ, այս պահին խուզարկում են Հիմնադիր խորհրդարանի վանաձորյան գրասենյակը: Մյուս մարզերի համապատասխան կառույցներից այս պահին չկա տեղեկատվություն:
Կատարվածը, Սյուզան Սիմոնյանի դիտարկմամբ, ցույց է տալիս ռեժիմի խուճապային իրավիճակը.
«Պարզ է, որ վախենում են և դիմում են անօրինական միջոցների, ես դեռ շատ տեղեկացված չեմ, երբ ավելի պարզ կլինի պատկերը, թե ինչպես է տեղի ունեցել, շատ ավելի ճշգրիտ բնորոշում կտանք, բայց այն, որ այս ռեժիմը ամեն ինչի գնալու է, և ոչ մի բանի առջև չի կանգնելու, մենք դրան պատրաստ ենք, և մենք նաև վստահ ենք, որ նրանց համար չափազանց դժվար է լինելու մեզ հետ գործ ունենալը: Ինչ է նշանակում տարել են, բայց բոլորին հո՞ չեն կարող տանել, թող փորձեն բոլորիս տանել»,-հավելեց նա:
Նա տեղեկացրեց, որ այս պահին բերման են ենթարկվել Կարո Եղնուկյանը, Վարուժան Ավետիսյանը, Ժիրայր Սեֆիլյանը, Պավել Մանուկյանը, Հովհաննես Ղազարյանը և Թորոս Սեֆիլյանը:
Հիշեցնենք, որ 100-ամյակն առանց ռեժիմի շարժումը ապրիլի 24-ի երեկոյան բոլորին հանրահավաքի էր հրավիրում՝ իշխանափոխություն իրականացնելու նպատակով:
Լուսանկարը` PanARMENIAN Photo-ի
