Քանի որ ԿԺԴՀ-ն դուրս է եկել Միջուկային զենք չտարածելու պայմանագրից, կարող է իրեն թույլ տալ գործողություններ անել իր շահերի շրջանակներում: Այս մասին հայտարարել է Իրանի ԱԳՆ ղեկավար Ալի Աքբար Սալեհին՝ մեկնաբանելով Հյուսիսային Կորեայի՝ միջուկային փորձարկումներ անելու մասին տեղեկությունը:
Ավելի վաղ Իրանի ԱԳՆ-ն քննադատել էր Հյուսիսային Կորեայի կողմից ստորգետնյա միջուկային փորձարկման անցկացումը,- հայտնում է AFP-ը:
ՄԱԳԱՏԷ-ն ԿԺԴՀ-ի երեքշաբթի կատարած փորձարկումն անվանել է ՄԱԿ-ի Անվտանգության խորհրդի բանաձևերի ակնհայտ խախտում: «ԿԺԴՀ-ն հայտարարեց միջուկային զենքի երրորդ փորձարկման մասին՝ չնայած միջազգային հանրության՝ դա չանելու կոչերին: Սա խոր ցավ է հարուցում»,- ասել է ՄԱԳԱՏԷ-ի ղեկավար Յուկիյա Ամանոն:
Երեքշաբթի օրը ՄԱԿ-ի Անվտանգության խորհուրդն արտահերթ նիստ է անցկացրել՝ նվիրված ԿԺԴՀ-ի կատարած միջուկային փորձարկմանը: Հանդիպման նախաձեռնողը Հարավային Կորեան է եղել:
Հիշեցնենք՝ երեկ ԿԺԴՀ-ն պաշտոնապես հայտարարել է մեծ ավերիչ ուժով ստորգետնյա կոմպակտ միջուկային սարքի հաջող փորձարկման մասին:
Հյուսիսային Կորեայի գործողություններն արդեն քննադատել են ՆԱՏՕ-ն, ՄԱԿ-ը, ԵՄ-ն, ԱՄՆ-ը, Գերմանիան, Մեծ Բրիտանիան, Ավստրալիան, Ճապոնիան, Չինաստանը և Ֆրանսիան,- փոխանցում է R rosbalt.ru-ն:
