Սիրիայի բանակը երկրի արևմտյան նավահանգստային Բանյաս քաղաքում հատուկ գործողություն է անցկացնում այնտեղ պատսպարված զինված ծայրահեղականների դեմ: Այս մասին հաղորդում է սիրիական SANA լրատվական գործակալությունը:
Արաբական որոշ հեռուստաալիքներ հաղորդում են տասնյակ սպանվածների և վիրավորների մասին: Սակայն այլ տեղեկություններ այս քաղաքից ստանալ հնարավոր չէ, քանի որ անջատված է բջջային և քաղաքային ֆիքսված հեռախոսակապը: Առավոտվանից քաղաքի ապստամբները սկսել են բարիկադներ կառուցել կառավարական տեխնիկայի ճանապարհին:
Հիմա հիմնական զինտեխնիկան կենտրոնացած է նավթավերամշակման գործարանի մոտ, որպեսզի հնարավոր չլինի այն գրավել: Սիրիայի ընդդիմադիր կայքերը հաղորդում են, որ որոշ զինվորականներ մահապատժի են ենթարկվել այն բանից հետո, երբ հրաժարվել են զենք բարձրացնել խաղաղ բնակիչների վրա:
Հիշեցնենք, որ չնայած Սիրիայի կառավարության կողմից սկսված բարեփոխումներին` այս երկրում չեն դադարում բախումները: Երեկ ամենամեծ բախումը տեղի է ունեցել Սիրիայի հարավում` Դարա’ա քաղաքում, որտեղ սպանվել է 26 ցուցարար:
