«Տիգրան Սարգսյանի հրաժարականից հետո ոչինչ չի փոխվել, աշխատատեղեր կրկին չկան, գործարանները չեն վերագործարկվում, կոռուպցիան էլ ավելանում է»,- «Առաջին լրատվական»-ի հարցախույզի ընթացքում ասացին երևանցիները:
Նրանց կարծիքով՝ փոփոխություններ կլինեն, երբ արտադրությանը զարկ տրվի, ներդրումային միջավայր ստեղծվի, որի ուղղությամբ դեռևս տեսանելի արդյունքներ չկան: «Խոստումներ, հայտարարություններ կան, բայց գործ չկա, Համաշխարհային բանկի ծրագրերի ներդրումները ընդունում են, փողերը գրպանում»,- նշեցին երևանցիները:
Հարցախույզի մասնակիցները փորձեցին նաև զուգահեռներ անցկացնել Տիգրան Սարգսյանի և Հովիկ Աբրահամյանի միջև՝ նշելով, որ երկուսն էլ երկրի համար շոշափելի գործեր չեն արել, բայց գոնե Տիգրան Սարգսյանը կիրթ էր, գրագետ, լեզուների էր տիրապետում, որ երկրից դուրս հանդիպումներ էր ունենում՝ հանգիստ էին լինում. «Կարողանում էր շփվել, իսկ Հովիկ Աբրահամյանը… վերջերս նրա համար ամաչեցինք, երբ Մեդվեդևի հետ հանդիպեց, շատ վատ զգացինք, թուղթը հանեց ու անգամ բարևելը կարդաց»:
Ինչ վերաբերում է կոռուպցիայի դեմ պայքարին, ապա քաղաքացիները Հովիկ Աբրահամյանին հորդորեցին հիշել, որ կոռուպցիան հենց իրենցից՝ վերևներից է սկսում. «Պիտի քաղաքացիներին անմիջական մասնակից դարձնեն պայքարին, թե չէ համատարած հուսալքություն է, միջին դասը վերացած է, բոլորը աղքատ են դարձել»:
Մանրամասները՝ տեսանյութում: