Գիտական ամսագրերը, որտեղ հետազոտողներն ուղարկում են իրենց հոդվածները վերանայման և հետագա հրապարակման համար, լինում են լայն և նեղ մասնագիտացած, հայտնի և ոչ այնքան: Վարկանիշի միասնական համակարգ ամսագրերը չունեն: ԱՄՆ Բանգորի համալսարանի կենսաբան Նիլ Հեդդեուեյը, սակայն, ստեղծել է Journalysis.org կայքը, որը կոչված է հեշտացնելու գիտնականների կյանքը «թղթային» աշխատանքի ժամանակ: Այս մասին հայտնում է vesti.ru-ն:
«Իմ նախագծով ես կուզենայի խրախուսել լավ գիտական ամսագրերը և, իհարկե, ողջամտության սահմաններում, ամաչեցնել ոչ բարեխիղճ պարբերականներին»,- պատմում է Հեդդեուեյը:
Ամերիկացի կենսաբանի մշակած ծառայությունը մի քանի նմանօրինակ ունի, որոնք ևս ստեղծվել են վերջին մի քանի տարում: Դրանք բոլորն ընդհանուր առմամբ օգտատերերին հնարավորություն են տալիս որոշակի ֆիլտրեր միացնել անհրաժեշտ գիտական ամսագրի որոնման համար՝ հրապարակման հեղինակությունից մինչև արագություն, և առաջարկվող ցանկից ընտրել այն, որն ունի ամենաբարձր վարկանիշն ու առավելագույն թվով դրական արձագանքները:
Ներկայումս հետազոտողները խոստովանում են, որ իրենց հոդվածների հրապարակման համար գիտական ամսագիր ընտրում են ծանոթների խորհուրդներով կամ փաստաթուղթն ուղարկում են նույն պարբերականին, որտեղ թողարկվել են հենց հեղինակների տեսանկյունից առավել հետաքրքիր հոդվածները: Այդ մեթոդը դժվարացնում է նոր գիտական ամսագրերի մուտքը շուկա, որոնք ևս կարող են հեռանկարային և հարգանքի արժանի լինել:
Բացի դրանից՝ «ծանոթությամբ» հրապարակման սխեման գործում է բացառապես Հյուսիսային Ամերիկայի և Արևմտյան Եվրոպայի համալսարանների հետ համագործակցող հետազոտողների համար, քանի որ հենց ամերիկյան և բրիտանական ամսագրերն են համարվում առավել հեղինակավոր, հարգարժան և ճանաչված: Աշխարհի այլ անկյուններից, սակայն, բազմաթիվ գիտնականների անգլալեզու մամուլի հետ ծանոթության համար լրացուցիչ ծառայության կարիք կլինի, որի բացն էլ կլրացնեն Journalysis-ը և նմանօրինակ այլ կայքեր:
