IBM-ը 4 տարում 3 մլրդ դոլար կծախսի «իրերի համացանց» իր ստորաբաժանման վրա: Այս մասին ընկերությունը հայտնում է իր կայքում: Այն Weather Company-ի հետ, որը Weather Channel եղանակի մասին հեռուստաալիքի սեփականատերն է, բիզնեսին կտրամադրի եղանակի մասին վերլուծություն և տվյալներ: Այդ տվյալներն IBM-ը կվերլուծի Watson համակարգի օգնությամբ:
«Weather Company-ի և IBM-ի համագործակցությունը կարող է ավելի խելացի դարձնել կրիտիկական կարևոր բիզնես-համակարգերի աշխատանքը»,- ասել է IBM Analytics-ի ավագ փոխնախագահ Բոբ Պիչիանոն: Նրա խոսքով՝ «իրերի համացանցի» միջոցով երկու ընկերությունները եղանակի մասին տվյալներ կհավաքեն ամբողջ մոլորակի սենսորներից, դրանք կպահեն ամպի մեջ, կմշակեն և ամբողջ ծավալով կտրամադրեն ընկերություններին:
«Իրերի համացանց»-ը ենթադրում է համացանցին միացնել սարքեր, որոնք մեխանիկորեն տեղեկություն են ստանում և փոխանցում: IBM-ը պատրաստվում է եղանակի վերլուծության համար օգտագործել Weather Company-ի՝ համացանցին միացված հաղորդիչները, որոնք հավաքում են ջերմաստիճանի, ճնշման, խոնավության և այլ ցուցանիշները:
Weather Company-ն ներկայումս օգտատերերին տալիս է վայրկյանում մոտ 700.000 կանխատեսում: Ավելի ստույգ կանխատեսումները ավտովարորդներին հնարավորություն կտան խնայել մեքենաների վերանորոգման գումարը. IBM-ի տվյալներով՝ ամեն տարի ապահովագրողները 1 մլրդ դոլար են վճարում միայն այն վարորդներին, որոնց մեքենաները տուժել են կարկուտից: Եղանակի մասին տվյալների վերլուծությունը հնարավորություն կտա օպտիմալացնել էներգասպառումը. Տեխաս նահանգում 32 աստիճան Ցելսիուսից մինչև 35 աստիճան ջերմաստիճանի բարձրացումն էլեկտրաէներգիյաի համար ընդհանուր ծախսերն ավելացնում է օրական 24 մլն դոլարով:
