2012թ. սեպտեմբերին ՀՀ-ում պաշտոնապես մեկնարկեց «Հյուսիս-Հարավ» ավտոմայրուղու շինարարությունը, որը ենթադրաբար պետք է տարանցիկ ճանապարհ լինի Իրանից դեպի Վրաստան: «Առաջին լրատվական»-ը Վրաստանում տրանսպորտային ոլորտում անկախ փորձագետ Պաատա Զաքարեաշվիլիից հետաքրքրվեց, թե որքանո՞վ է այդ մայրուղին հետաքրքիր վրացական կողմի համար, և արդյոք դրա կառուցումից հետո վրացիները կնախընտրեն Իրանի հետ բեռնափոխադրումներ իրականացնել Հայաստանո՞վ, թե՞ Ադրբեջանով:
Պ. Զաքարեաշվիլին պատասխանեց, որ այս կամ այն երթուղու ընտրությունը կախված է տնտեսական նպատակահարմարությունից. «Այս փուլում Հայաստանի տարածքով «Հյուսիս-Հարավ» մայրուղու կառուցումը պահանջում է զգալի ֆինանսական միջոցներ (1.3 մլրդ դոլար) և կախված է միջազգային կառույցներից ֆինանսների ներգրավումից, նաև կարող են դժվարություններ լինել քաղաքական գործոնի ազդեցությամբ, և այս մայրուղու կառուցումը հետաձգվի նվազագույնը 6-8 տարի: Այս պարագայում, և ստատուս քվոյի պահպանման դեպքում, հաշվի առնելով Հայաստանի լեռնային և եղանակային պայմանները, կարծում եմ, իրանցի բեռնափոխադրողները կընտրեն Ադրբեջանի տարածքը՝ իրենց բեռները ապագայում Վրաստանի նավահանգիստներ փոխադրելու համար, որպեսզի խուսափեն հավելյալ ֆինանսական ծախսերից»:
Փորձագետը շեշտեց, որ ամեն ինչ կախված է տնտեսական գործոնից:
Ընդգծենք, որ հարցերն ուղղվել էին՝ պարզելու վրացական կողմի տեսակետները, իսկ Զաքարեաշվիլին խուսափել է ուղիղ պատասխանել ու կարծիք է արտահայտել իրանցի բեռնափոխադրողների դիտանկյունից:
