17 մարդ, նրանց թվում նաև դերասաններ Հյու Գրանտն ու Քրիսթոֆեր Էքլսթոնը, ինչպես նաև դքսուհի Սառա Ֆերգյուսոնը հրաժարվել են դատական հայցից News of the World-ի նկատմամբ, որը պատկանում է մեդիամագնատ Ռուպերտ Մերդոկին: Թերթը փակվել է 2011 թ.: Այս մասին հայտարարվել է այսօր բրիտանական մայրաքաղաքի Գերագույն դատարանում:
News Group Newspapers ընկերությունը, որն էլ հենց թողարկել է թերթը, տուժածներին փոխհատուցում է վճարել, որի չափը չի հրապարակվում, ինչպես նաև ներողություն է խնդրել:
Անցած ուրբաթ ԱՄՆ-ում Ռուպերտ Մերդոկի News Corporation ընկերությունը հայտարարել է, որ ընկեության ծախսերը, մասնավորապես դատական հայցերի կարգավորումը, 2012 թ. վերջին եռամսյակում 56 միլիոն դոլար են կազմել:
Բուլվարային News of the World հրատարակչության շուրջ սկանդալը ծագել էր 2011 թ., երբ պարզվել էր, որ եկար տարիներ հրատարակչության աշխատակիցները անօրինական կերպով գաղտնալսել են շոու բիզնեսի աստղերի, գործարարների և այլ հայտնի բրիտանացիների հեռախոսները:
Ոստիկանական հետաքննության ժամանակ պարզվել է, որ հեռախոսների գաղտնալսումները զանգվածային և պարբերական բնույթ են կրել: Անօրինականորեն ստացված տեղեկատվության հիման վրա հրատարակչությունը սկանդալային նյութեր է հրապարակել՝ մեծացնելով տպաքանակն ու շահույթը:
