Վերաքննիչ քրեական դատարանում ավարտվեց Մյասնիկ Իսպիրյանի գործով բերված բողոքի քննությունը:
Գործը քննվել է Շիրակի մարզի ընդհանուր իրավասության դատարանում Աշոտ Մանուկյանի նախագահությամբ:
22-ամյա Մյասնիկը մեղավոր է ճանաչվել խուլիգանության համար:
2012 թվականի դեկտեմբերին Մյասնիկը դատվել էր գողության համար, դատապարտվել էր 500 հազար դրամ տուգանքի:
Ըստ ներկա գործով կայացված դատական ակտի՝ 2014 թվականի հունիսի 13-ին, ժամը 17-ն անց 30-ի սահմաններում Մյասնիկը, ալկոհոլի ազդեցության տակ, իր «ՎԱԶ-2108» մակնիշի ավտոմեքենայով գտնվել է Մարալիկ քաղաքի Շահումյան փողոցում:
Մեքենայի շարժիչը խափանվել է:
Այդ վայրում հասարակական կարգի պահպանություն իրականացնող ոստիկաններ Ա. Ֆռանկյանը, Մ. Մանասյանը և Ա. Սարգսյանը օգնել են Մյասնիկին, նրա խափանված մեքենան դուրս են բերել ճանապարհի երթևեկելի մասից:
Բայց դրանից հետո, ըստ դատական ակտի, Մյասնիկը անհիմն վիճաբանել է իրեն օգնած ոստիկանների հետ, տվել է հայհոյանքներ, ապա խուլիգանական գործողությունները դադարեցնելու՝ ոստիկանների օրինական պահանջին ի պատասխան՝ քաշքշել է նրանց, բռունցքով մեկ անգամ հարվածել է Ա. Ֆռանկյանի դեմքին ու պատճառել է վնասվածք:
Այս արարքի համար՝ մեղսագրված հոդվածով Մյասնիկն իրեն մեղավոր է ճանաչել ընդհանուր իրավասության դատարանում: Գործը քննվել է արագացված ընթացակարգով:
Ընդհանուր իրավասության դատարանը հաշվի է առել ամբաստանյալի վատառողջ լինելը:
Մյասնիկ Իսպիրյանը մեղավոր է ճանաչվել ՀՀ քրեական օրենսգրքի 258 հոդվածի 3-րդ մասի 2-րդ կետով ու դատապարտել է տուգանքի՝ 400 հազար դրամի չափով:
Դատավճռի դեմ վերաքննիչ բողոք էր բերել մեղադրողը՝ միջնորդելով Մյասնիկ Իսպիրյանին դատապարտել 1 տարի 6 ամիս ազատազրկման՝ իրական ազատազրկումը համարելով կատարված արարքին համաչափ ու ամբաստանյալի անձին համապատասխան պատիժ:
Վերաքննիչ քրեական դատարանը մեղադրողի բողոքը բավարարեց մասնակիորեն: Դատավճիռը պատժի մասով փոփոխվեց:
Մյասնիկ Իսպիրյանը դատապարտվեց 6 ամիս ազատազրկման:
Պատժի սկիզբը կհաշվվի նրան փաստացի կալանքի տակ առնելու օրվանից:
