«Առաջին լրատվական»-ի «Անտինոմիա+» հաղորդաշարի հյուրն է «Ժողովրդական Հայրենիք» կուսակցության նախագահ Պետրոս Մակեյանը:
–Փաստորեն, Երևանի քաղաքապետարանը մերժեց ամսի 20-ին շտապ հավաք անցկացնելու ծանուցագիրը՝ վիճարկելով ներկայացված հիմքերը: Այսպիսով, իշխանությունը իրեն իրավունք վերապահեց այդ՝ այսպես կոչված անօրինական հավաքը ցրելու ուղղությամբ որոշակի գործողություններ կիրառելու: Ըստ Ձեզ՝ վարչակազմը կգնա՞ դրան և կփորձի՞ դեռ չսկսած՝ խեղդել Գագիկ Ծառուկյանի դիմադրությունը, թե՞առայժմ ձեռնպահ կմնա:
–Մենք ունենք հստակ մտավախություն, որ հնարավոր է նոր Մարտի 1՝ բազմապատիկ շատ զոհերով, այդ պատճառով ելք ենք առաջարկել իշխանություններին՝ գնալ արտահերթ նախագահական ընտրությունների կամավոր:
–Կարծում եք՝ դա իրատեսակա՞ն ելք է:
–Դա տեսական տարբերակ է, մեր երկրի համար լավագույն տարբերակն է, բայց և կարծում եմ՝ կյանքում չիրագործվող է: Առավել ևս այն սցենարը, որ Դուք ներկայացրիք, արդեն կա, առաջին քայլը՝ վարչախումբը որոշել է չթույլատրել Ազատության հրապարակից օգտվել: Բնականաբար, իրենք նախանշում են այն սցենարները, որոնք յուրահատուկ են վարչախմբի ոճին վերջին 2 տասնամյակում: Դա բավական բարդ է, և իմ փորձը ցույց է տալիս, որ իրենք փորձում են հենց բնի մեջ խեղդել պրոցեսը: Բայց ըստ իս, պրոցեսը ոչ թե սահմանափակվում է Եռյակով, Գագիկ Ծառուկյանով, առավել ևս՝ ԲՀԿ-ով, սրանց թիկունքում կան մարդիկ, մասնավորապես մեկը երեկ խոսեց՝ Քոչարյան Ռոբերտը: Նաև դրսի մեսիջներ կան, որ մղում են: Այս պարագայում շատ հավանական է, որ գնա սուր առճակատում:
–Իսկ հնարավոր համարու՞մ եք, որ Եռյակը առայժմ որոշի չգնալ դրան և փորձի հանրահավաքի անցկացման, իրազեկման անխոցելի ընթացակարգ ապահովել:
–Եռյակում, կարծում եմ, փորձված մարդիկ կան, առավել ևս՝ Լևոն Տեր-Պետրոսյանը: Իրենք հասկանում են՝ եթե պրոցեսը չսկսեն և շատ արագ չզարգացնեն, ապա տեմպը կկորցնեն, ինչի հնարավորությունն իրենք ունեն՝ սկսել ու ավարտել իրենց հաղթանակով: Որովհետև հասարակությունը մինչև կոկորդն արդեն կշտացած է այս վարչախմբից՝ դա փաստ է: Ինչքան էլ իրենք ուզում են ապացուցել, որ բարոյական պայքար է, արժեհամակարգի պայքար է, բայց իրենք նույն տեսակն են:
