Այսօր՝ փետրվարի 14-ին, աշխարհի շատ երկրներում սիրահար զույգերը նշում են ամենառոմանտիկ տոներից մեկը՝ Սուրբ Վալենտինի կամ Բոլոր սիրահարների օրը՝ գրում է Calend-ը:
Համարվում է, որ Սուրբ Վալենտինի օրը գոյություն ունի արդեն 16 դար, սակայն Սիրո տոները հայտնի են եղել նույնիսկ ավելի վաղ՝ հին հեթանոսական մշակույթի ժամանակներում:
Տոնի «մեղավորը» քրիստոնյա քահանա Վալենտինն է: Այս պատմությունը թվագրվում է մոտ 269 թվականին՝ հռոմեական կայսր Կլավդիոս II-ի օրոք:
Բանն այն է, որ այդ ժամանակ հռոմեական բանակը զինվորների խիստ կարիք ուներ, և գլխավոր հրամանատարը վստահ էր, որ իր ծրագրերի ձախողման պատճառն ամուսնություններն են, քանի որ ամուսնացած մարդը կայսրության փառքի մասին ավելի քիչ է մտածում: Ուստի կայսրն իր լեգեոներների ամուսնությունն արգելող հրաման է տվել:
Սակայն դրանից զինվորները չսկսեցին քիչ սիրահարվել: Եվ գտնվեց մի քահանա, ով գաղտնի և առանց վախենալու կայսեր զայրույթից՝ նրանց պսակադրում էր իրենց սիրելիների հետ: Նա հռոմեական Տերնի քաղաքից քահանա Վալենտինն էր, ով նաև սիրահարներին օգնում էր միմյանց գաղտնի նամակներ փոխանցել:
Իմանալով այս մասին՝ կայսրը նրան մահապատժի է դատապարտում: Վալենտինը սիրահարված էր բանտապետի դստերը և մահապատժից առաջ նամակ է գրում նրան՝ խոստովանելով իր սերը և նամակի վերջում հավելելով. «Քո Վալենտին»: Նամակն աղջիկը կարդում է նրա մահվանից հետո:
Իսկ 496-ին Հռոմի պապ Գելասիուս I-ը փետրվարի 14-ը հայտարարեց Սուրբ Վալենտինի օր:
