ԱՄՆ նախագահ Բարաք Օբաման ներկայացրել է էմիգրացիոն բարեփոխումների նախագիծը, որի շրջանակում անօրինական ներգաղթյալները ամերիկյան քաղաքացիություն ստանալու իրավունք կունենան, սակայն մի շարք պայմանների կատարման դեպքում: Այս մասին հայտնում է RIA Novosti-ն:
Օբամայի բարեփոխումը կազմված է 4 մասից՝ սահմանների ամրացում, առանց փաստաթղթերի աշխատակիցների վարձող ընկերությունների դեմ միջոցառումների ընդունում, անօրինական ներգաղթյալներին պատասխանատվության ենթարկում մինչ քաղաքացիություն ստանալը: Դա նշանակում է հարկեր ու տուգանքներ վճարելու, անգլերեն սովորելու և կենսաբանական ստուգումներ անցնելու պահանջ: Սպիտակ տան հաղորդագրությունում նշվում է, որ չորրորդ մասն է՝ դարձնել էմիգրացիոն համակարգը հասկանալի ընտանիքների, աշխատավորների և գործատուներ համար:
Օբաման երեքշաբթի Լաս Վեգասում հանդես է եկել ելույթով, որի ժամանակ ներկայացրել է բարեփոխման հիմնական կետերը:
ԱՄՆ վարչակազմը անարդյունավետ միջոց է համարում ներկայումս երկրում գտնվող 11 միլիոն անօրինական ներգաղթյալների արտաքսումը: Բարեփոխումը նպատակ ունի ստիպել նրանց դուրս գալ ստվերից և դառնալ երկրի նորմալ բնակիչներ:
Բարեփոխումը նախատեսում է նաև միջազգային հանցավորության դեմ պայքարի շարունակություն, ամերիկյան իրավապահ մարմինների և արտասահմանցի գործընկերների հետ համագործակցության ամրապնդում, կեղծ փաստաթղթերի դեմ պայքար, հանցագործների արտաքսում և միգրացիայի հետ կապված հարցերում ամերիկյան դատական համակարգի աշխատանքի կատարելագործում:
