Պաշտպանական կողմը դատարանին խնդրում է արդարացնել խորտակված Costa Concordia զբոսանավի կապիտան Ֆրանչեսկո Սկետինոյին, ով մեղադրվում է նավաբեկության, 2 և ավելի մարդկանց չկանխամտածված սպանության, նավն ու մարդկանց վտանգի մեջ թողնելու համար: Այս մասին հայտնում է Ria Novosti-ն:
Հաղորդվում է, որ դատարանում Սկետինոյի փաստաբան Դոմենիկո Պեպեն ասել է, որ նավի հետ կատարվածը «անսպասելի» և «անկանխատեսելի» դեպք է եղել: «Բայց եթե դատարանը վճիռ կայացնի հօգուտ պատժի, մենք օրենքով նախատեսված նվազագույն պատժի հույս ունենք, և որ կընդունվեն մեղմացուցիչ հանգամանքները»,- ասել է Պեպեն:
Նրա խոսքով՝ նա «չի թողել նավը, և չի եղել նավը լքելու համանի ուշացում»: «Ամբողջ տեղի ունեցողի ֆոնին նա (Սկետինոն) 45 րոպե է ունեցել, որպեսզի որոշում ընդունի ավելի քան 4000 ուղևորի կյանքը փրկելու համար: Սկետինոն ճիշտ որոշումներ է ընդունել»,- ասել է փաստաբանը՝ հավելելով, որ նավի անձնակազմը պատրաստ չի եղել նման վթարի: «Նա (Սկետինոն) ԶԼՄ-ների ճնշումից տուժած լավ մարդ է»,- ասել է Պեպեն:
Costa Concordia զբոսանավը խորտակվել է 2012թ. հունվարին՝ Ջիլո կղզու ափերի մոտ: Աղետի հետևանքով զոհվել է ավելի քան 32 մարդ, ավելի քան 100 մարդ տուժել է:
Այդ գործով միակ մեղադրյալ Սկետինոյի դատավճիռը կարող է հրապարակվել փետրվարի 11-ին կամ մինչև շաբաթվա վերջ: Costa Concordia-ի նախկին հրամանատարը կարող է դատապարտվել 22 տարվա ազատազրկման:
