1990-ականներին երկու հուժկու պայթյուններ ցնցեցին Արգենտինան: Դրանք ուղղված էին հրեական հասարակության դեմ: Երկու երկրները պայմանվորվել են հատուկ հանձնաժողով ձևավորել, որը կզբաղվի Բուենոս Այրեսում՝ հրեական մշակույթի կենտրոնի մոտ, 1994 թվականի հուլիսի 18-ին տեղի ունեցած պայթյունի հանգամանքների հետաքննմամբ: Արգետինացի դատավորները նախկինում բազմիցս մեղադրել են Իրանին 85 մարդու կյանք խլած հարձակմանը մասնակից լինելու մեջ: Այս մասին հայտնում է BBC-ն:
Արգենտինայի նախագահ Քրիստինա Ֆերնանդեսի խոսքերով՝ հանձնաժողովի ստեղծման մասին համաձայնագիրը ստորագրվել է Արգենտինայի և Իրանի արտգործնախարարների կողմից Եթովպիայում անցկացված Աֆրիկյան միության գագաթնաժողովի կուլուարներում: Համաձայնագիրը դեռ պետք է հավանության արժանանա երկու երկրների խորհրդարանների կողմից:
«Երկխոսությունը հակամարտությունները լուծելու միակ միջոցն է, որքան էլ բարդ լինեն այդ հակամարտությունները»,- Twitter-ի իր միկրոբլոգում գրել է Արգենտինայի նախագահը՝ անվանելով Իրանի հետ ձեռք բերած պայմանագիրը «պատմական»:
Հանձնաժողովը կազմված կլինի 5 օտարերկրացի մասնագետներից: Նրանում չեն ընդգրկվի Իրանի և Արգենտինայի քաղաքացիներ:
