Երեքշաբթի ՄԱԿ-ի Անվտանգության խորհրդի կողմից հավանության արժանացած բանաձևը, որը նախատեսում է պատժամիջոցների ընդլայնում Հյուսիսային Կորեայի դեմ, վրդովմունքի մեծ ալիք է բարձրացրել այդ երկրում:
Հանրապետության բոլոր տարածաշրջաններում, որտեղ կարծում են, թե փաստաթուղթը ընդունվել է ԱՄՆ-ի և նրա դաշնակիցների նախաձեռնությամբ, հնչում է «Մա´հ ամերիկացի իմպերիալիստներին` կորեացի ժողովրդի անիծյալ թշնամիներին» կարգախոսը: Ռադիոյով և հեռուստատեսությամբ հեռարձակվում են ռազմական քայլերգեր, հայտնի հայրենասիրական երգեր, որոնք փառաբանում են երկրի առաջնորդներին՝ Կիմ Իր Սենին, Կիմ Չեն Իրին և Կիմ Չեն Իրնին: Այս մասին հայտնում է ITAR-TASS-ը:
Այս օրերին շատ կորեացիներ ցանկություն են հայտնել ինքնակամ միանալու Կորեայի ժողովրդական բանակի շարքերին: Թերթերը մեջբերում են զինված ուժերի ներկայացուցիչների, գիտական շրջանակների, աշխատավորների ու գյուղացիների կարծիքները, որոնք միաձայն կողմ են արտահայտվում երկրում հերթական՝ թվով երրորդ միջուկային փորձարկմանը և ԱՄՆ-ի սադրիչ քաղաքականության դեմ հրթիռային արձակումների շարունակմանը:
ՄԱԿ-ի ԱԽ բանաձևը մեզ այլ ընտրություն, քան միջուկային փորձարկումներն են, չի թողնում՝ գրում է առաջատար «Նոդոն սինմուն» թերթը: «Միջուկային փորձարկումները մեր ժողովրդի պահանջն են»,- մեջբերում է թերթը Կորեայի իշխող` Աշխատանքային կուսակցության կարծիքը:
Նշենք, որ բանաձևը կապված է դեկտեմբերի 12-ին Հյուսիսային Կորեայի կողմից հրթիռակրի արձակման հետ, որը ուղեծիր դուրս բերեց արհեստական արբանյակ:
