Ռուսաստանում կարող է չեղյալ հայտարարվել մահապատժի նկատմամբ մորատորիումը Եվրոպայի խորհրդից դուրս գալուց հետո, հայտարարել է Պետդումայի նախագահի տեղակալ Իգոր Լեբեդևը «Խոսում է Մոսկվան» ռադիոկայանի եթերում:
«Այսօրվա դրությամբ օրակարգում այդ հարցը չկա: Ռուսաստանը իր մասնակցությունը Եվրոպայի խորհրդում կասեցնում է 1 տարով: Դուրս գալու մասին դեռ խոսք չկա: Դուրս գալու մասին խոսք կարող է լինել միայն 2016թ. հունվարին այն դեպքում, եթե Խորհրդարանական վեհաժողովից ինչ-որ մեկը վիճարկի Ռուսաստանի լիազորությունները, և վեհաժողովը դրան կողմ քվեարկի»,- ասել է Լեբեդևը:
Նրա խոսքով՝ ԵԽԽՎ-ից դուրս գալը նշանակում է, որ Ռուսաստանը մահապատժի առնչությամբ ազատ է լինելու եվրոպական որոշումներից:
«Այդ դեպքում Պետդուման կամ նախագահը ի վիճակի են չեղյալ հայտարարել գործող մորատորիումը, ու մենք հնարավորություն ունենք վերադարձնել «մահապատիժ» հասկացությունը մեր իրավական դաշտ»,- հայտարարել է Լեբեդևը: