2012թ. հունվարին Apple ընկերությունը խզել է կապերը Չինաստանի իր մատակարարներից մեկի՝ Guangdong Real Faith Pingzhou Electronics ընկերության հետ: Ինչպես հաղորդում է Lenta.ru-ն՝ վկայակոչելով ընկերության պաշտոնական հաշվետվությունը, Apple-ի ստուգումներից պարզվել է, որ մատակարարի գործարաններում աշխատում է մանկական աշխատուժ:
Apple-ը բացահայտել է դեռահասների աշխատուժի օգտագործման 74 դեպք: Հաշվետվության մեջ նշվում է, որ Guangdong Real Faith Pingzhou Electronics-ը բաղադրիչներ է արտադրում տնտեսության տարբեր ճյուղերի շատ ընկերությունների համար:
Պարզվել է, որ երեխաները ձեռնարկությունում աշխատում են Shenzhen Quanshun Human Resources գործակալության միջոցով: Apple-ը բողոք է ներկայացրել տեղի իշխանություններին` ընդդեմ գործակալության, որից հետո այն տուգանվել է, իսկ արտոնագիրը դադարեցվել է:
Apple-ին բազմիցս քննադատել են այն պատճառով, որ վերջինիս մատակարարները օգտագործում են մանկական աշխատուժ, իսկ գործարաններում աշխատանքի պայմանները չեն համապատասխանում օրենսդրությանը:
