Այսօր՝ հունվարի 26-ին, Թուրքիայի ընդդիմադիր, քեմալական Ժողովրդահանրապետական կուսակցության նախագահ Քեմալ Քըլըչդարօղլուն Ստամբուլում հանդիպելու է Թուրքիայի հայ, հույն, հրեա և ասորի համայնքների հոգևոր առաջնորդներին։ Այս մասին հաղորդում է թուրքական «Անադոլու» լրատվական գործակալությունը։
ԺՀԿ-ի ղեկավարի հետ հանդիպմանը ներկա են լինելու Պոլսո հայոց պատրիարքի ընդհանուր փոխանորդ Արամ արքեպիսկոպոս Աթեշյանը, հույն ուղղափառ եկեղեցու Տիեզերական Պատրիարք Բարդուղիմեոսը, Թուրքիայի հուդդայական գլխավոր րաբբի Իսակ Հալևան, Ստամբուլի և Անկարայի ասորիների Կադիմ համայնքի հոգևոր առաջնորդ Յուսուֆ Չեթինը և ասորի կաթոլիկների հոգևոր առաջնորդ Յուսուֆ Սաղը։
Նախատեսվում է, որ հանդիպման ժամանակ համայնքների առաջնորդները կներկայացնեն Թուրքիայի ազգային փոքրամասնությունների խնդիրները, Քըլըչդարօղլուն էլ՝ դրանց վերաբերյալ Ժողովրդահանրապետական կուսակցության մոտեցումներն ու դիրքորոշումը։
Քեմալական կուսակցությունն իր պատմության ընթացքում հանդես է եկել ազգային փոքրամասնությունների, այդ թվում՝ նաև հայերի դեմ ուղղված քաղաքականությամբ, սակայն վերջին տարիներին, հաճախ նաև ընտրողների ձայներն ստանալու համար, Քեմալ Աթաթուրքի հիմնած կուսակցության անդամները փորձում են հանդուրժողականություն ցուցաբերել փոքրամասնությունների նկատմամբ: Դինքի սպանությունն ու դատավարությունն էլ ընդդիմադիր ԺՀԿ-ն փորձում է օգտագործել իշխող՝ «Արդարություն և զարգացում» կուսակցության դեմ քաղաքական պայքարում:
