Մեծ Բրիտանիայի, Գերմանիայի և Նիդերլանդների օրինակով այսօր Ավստրալիան կոչ է արել իր քաղաքացիներին անհապաղ լքել լիբիական Բենղազի քաղաքը: Այս մասին գրում է Australian թերթը՝ հղում անելով Ավստրալիայի ԱԳՆ հայտարարությանը:
«Մեզ հայտնի է կոնկրետ սպառնալիքի մասին, որն ուղղված է Բենղազիում արևմտյան երկրների քաղաքացիների դեմ»,- ասված է Ավստրալիայի ԱԳՆ հաղորդագրությունում: Այնտեղ ասվում է, որ գերատեսչությունը ունի տվյալներ արտասահմանցիների դեմ հարձակաման վտանգի մասին, և որ դա կապված է հարևան Մալիում Ֆրանսիայի կողմից իրականացվող ռազմական օպերացիայի հետ:
Երեկ վտանգի մասին էր հայտարարել Մեծ Բրիտանիայի ԱԳՆ-ն, որին հաջորդել էին Նիդերլանդների և Գերմանիայի արտաքին քաղաքական գերատեսչությունների հայտարարությունները:
Լիբիայի իշխանություններն իրենց հերթին Մեծ Բրիտանիայի ԱԳՆ-ի հայտարարությունը անվանել էին անհիմն, իսկ Լիբիայի փոխարտգործնախարար Աբդալլա Մասուդը զարմանք էր արտահայտել բրիտանացիների գործողությունների վերաբերյալ:
Նշենք, որ Ալժիրի հարավ-արևելքում նավթագազային համալիրի վրա իրականացված հարձակման հիմնական պատճառ ահաբեկիչները նշել էին Մալիում ֆրանսիական ուժերի կողմից իրականացվող օպերացիան: