Ադրբեջանի և Իսրայելի հարաբերությունների շուրջ շատ ենթադրություններ են առաջացել: Ինչպես հաղորդում է Contact.az-ը, հաղորդագրություններ են տարածվել նաև այն մասին, որ Իսրայելի ռազմական ինքնաթիռները կարող են կիրառել Ադրբեջանի օդանավակայանները՝ Իրանի վրա հարձակվելու դեպքում: Իրականում, այս երկրների երկկողմանի հարաբերությունները կրում են ոչ այնքան դրամատիկ, որքան պրագմատիկ բնույթ, նշում է գործակալությունը:
Այսօր Իսրայելի և Թուրքիայի հարաբերությունները լարված են, իսկ Իրանը վերածվել է երդվյալ թշնամու, այդ պատճառով Իսրայելի արտաքին ռազմավարության կարևոր օղակներից մեկը դարձել է Ադրբեջանը: Սակայն Բաքուն չի կարող նախկին ռազմավարական դաշնակիցների կորուստների համար փոխհատուցել Իսրայելին: Գործակալության փոխանցմամբ` Բաքուն ի վիճակի չէ Իսրայելին տրամադրել այն աջակցությունը, որը վերջինիս կօգներ պայքարել անվտանգության ոլորտի մարտահրավերների դեմ:
Ադրբեջանի տեսանկյունից Իսրայելի հետ հարաբերություններն արժեքավոր են, քանի որ նրա իշխանությունները կապված չեն ԱՄՆ-ում, Եմ-ում գործող էմբարգոյի հետ, որն արգելում է զենք վաճառել Ադրբեջանին: Այսպիսով, Իսրայելը սպառազինման կարևոր աղբյուր է Բաքվի համար: Իսրայելն Ադրբեջանին մատակարարում է ռազմական տեխնիկա և տեխնոլոգիա: Գործակալությունը նշում է, որ զինված ուժերի աճը հազիվ թե օգնի Ադրբեջանին՝ հասնել իր ռազմավարական նպատակին Լեռնային Ղարաբաղի հարցում:
Contact.az-ի փոխանցմամբ` Ադրբեջանի իշխանությունները ձգտում են նաև համագործակցել Վաշինգտոնի իսրայելական լոբբիի հետ: Ադրբեջանի կարծիքով` դա իմաստ ունի, քանի որ ցանկանում է հակազդել ԱՄՆ-ի քաղաքականության վրա ունեցած հայկական լոբբիի ազդեցությանը:
«Սակայն Բաքվի հույսերն այս կապակցությամբ ռեալիստական չեն: Լեռնային Ղարաբաղն առաջնային հարց չէ ամերիկացի հրեաների և իսրայելցիների համար: Բացի այդ՝ Վաշինգտոնում Իսրայելի կողմնակիցների մեծ մասը պատրաստ չէ հակամարտության մեջ մտնել հայկական լոբբի հետ»,-ընդգծում է գործակալությունը:
Ադրբեջանի բնակչության մեծ մասը խանդավառություն չի զգում Բաքվի և Իսրայելի հարաբերությունների հանդեպ: Երբ իսրայելի բարձրաստիճան պաշտոնյաններն Ադրբեջանն անվանում են «առաջընթացի օրինակ մուսուլմանական աշխարհում», դա միայն առաջացնում է Ադրբեջանի քաղաքացիների զայրույթը, որոնք դժգոհ են կաշառակերության բարձր մակարդակից և ազատության բացակայությունից:
Գործակալությունը նշում է, որ երկկողմանի հարաբերությունների պոտենցիալի բարձրացման համար, անհրաժեշտ է իրական, սթափ գնահատական երկու կողմերից էլ, իսկ ներկա պահին երկու երկրների դիվանագիտական նպատակները խստորեն տարբերվում են:
