«Ժողովուրդ» թերթը գրում է. «Հունվարի 19-ի լույս 20-ի գիշերը ղարաբաղա-ադրբեջանական շփման գծի ողջ երկայնքով հակառակորդի կողմից հերթական անգամ խախտվել է հրադադարի պահպանման ռեժիմը, ինչի արդյունքում հակառակորդի գնդակից զոհվել է 1995 թվականին ծնված Սուրեն Խաչիկի Փիլոսյանը:
ԼՂՀ ՊՆ տարածած հաղորդագրությունում նշված է նաև. «Նույն ժամանակահատվածում շփման գծի տարբեր հատվածներում ադրբեջանական զինուժի կողմից ձեռնարկվել են 8 հետախուզադիվերսիոն գործողությունների փորձեր, որոնք ժամանակին հավաստանշվել և կորուստներ կրելով՝ հետ են շպրտվել»: Սուրենը 2015-ի արդեն վեցերորդ զոհն է: Ակնհայտ է, որ Ադրբեջանը ինչ-ինչ պատճառներով վեջին շրջանում ավելի սանձարձակ և լկտի է դարձել, և ՀՀ ղեկավարությունը ինչ-որ միջոցներ պետք է ձեռնարկի՝ Ադրբեջանին սաստելու համար:
Տարեսկզբին ՀՀ ՊՆ Սեյրան Օհանյանի հնչեցրած հայտարարությունն այն մասին, որ հրամայել է հրադադարի ռեժիմի խախտման դեպքում նախահարձակ լինել, նպատակ ուներ սաստելու ադրբեջանական կողմին: Սակայն, ինչպես ցույց է տալիս ժամանակը, Օհանյանի խոսքերը մինչ օրս մնում են միայն որպես խոսք և ոչ ավելին:
Նրա հայտարարությունը սկսում է նմանվել Սաֆարովի վերաբերյալ Սերժ Սարգսյանի կողմից ԱԱԾ տնօրեն Գորիկ Հակոբյանին տրված հայտնի հանձնարարությանը, որը այդպես էլ ոչ մի հետևանք չունեցավ: Ժամանակն է, որպեսզի ՀՀ պաշտոնյաները սկսեն գիտակցել իրենց խոսքի արժեքը և եթե մի բան ի վիճակի չեն անելու, ապա ավելի լավ է այդ մասին չհայտարարեն: Նրանք իրենց հիմար վիճակի մեջ դնելուց բացի՝ վնասում են Հայաստանի հեղինակությանը»:
Մանրամասները` օրաթերթի այսօրվա համարում:
