Ավստրիայում այսօր անցկացվում է համընդհանուր զինապարտության վերացման և պրոֆեսիոնալ բանակի ներմուծման հարցով հանրաքվե: Այս մասին հայտնում է RIA Novosti-ն՝ հղում անելով երկրի ՆԳՆ-ին:
Քվեաթերթիկում երկու հարց կլինի: Քաղաքացիները կողմ կամ դեմ կարտահայտվեն մասնագիտական բանակի ներմուծմանը, ինչպես նաև իրենց վերաբերմունքը կարտահայտեն քաղաքացիական ծառայությանը: Ներկայում ավստրիացի զորակոչիկները, որոնք չեն ցանկանում ծառայել բանակում, այլընտրանք ունեն: Նրանք կարող են փոխարենը 9 ամիս աշխատել հիվանդանոցներում, ծերանոցներնում, փրկարար կամ շտապօգնության ծառայություններում կամ օգնել հաշմանդամներին:
Քվեարկության իրավունք ունի շուրջ 6.3 մլն ավստրիացի:
Հանրաքվեի հարցի շուրջ բանավեճերը Ավստրիայում տևել են մոտ երկու տարի: Դրանք վեճի առարկա են դարձել երկու խոշոր խորհրդարանական՝ Սոցիալ-դեմոկրատական և Ավստրիայի ժողովրդական կուսակցությունների միջև: Սոցիալ-դեմոկրատները պնդում են պրոֆեսիոնալ բանակի կարևորությունը, մինչդեռ մյուս կուսակցությունը հանդես է գալիս պարտադիր զինապարտության պահպանման օգտին: Հանրաքվեից 1 ամիս առաջ անցկացված սոցհարցումների արդյունքում պարզվել է, որ հարցման մասնակիցների 60 տոկոսը կողմ է արտահատվել զինապարտության պահպանմանը:
