«Ժամանակի մեջ հասարակությունը հասունանում է, քաղաքական ուժերը մնում են իրենց մակարդակում, չնայած որ երբեք չեն եղել լուրջ ուժեր: Ինչքան էլ խաբվում ու հիասթափվում է, մեկ է՝ հասունանում է հասարակությունը»,- «Արմնյուզ» հեռուստաընկերության «Բանաձև» հաղորդման եթերում ասել է «Ազգային միացյալ նախաձեռնության» համակարգող Շանթ Հարությունյանը: Նա ասել է, որ իրեն քիչ են հետաքրքրում կուսակցությունների ներսում եղած խնդիրները, մանավանդ որ հիմնական դերակատար ուժերին չի տեսնում ադեկվատ երկրի կյանքում:
«ՀԱԿ-ը ձևավորվել էր կոնկրետ անձի շուրջ՝ իշխանություն վերցնելու համար: Կգար, հետո մի բան կերևար: Գաղափարախոսություն չկար: Հստակ խնդիր կար՝ համախմբվել պրեզիդենտի թեկնածուի շուրջ և կրել ընտրությունները»,- ասել է Շանթ Հարությունյանն ու հավելել, որ այնտեղ կան շատ մարդիկ, որոնք չունեն քաղաքական համոզմունքներ: Միաժամանակ, հասարակությունը ևս չունի իր արժեհամակարգն ու դրա չափորոշիչները:
«Ես այս տարի ուզում եմ հեղափոխություն անեմ, ու եթե Աստված տա անեմ՝ ես երկրի քաղաքացին եմ կերտելու: 13 թ. հոկտեմբեր-նոյեմբերին կանեմ հեղափոխությունը, և մինչև 14 թ. փետրվար կլինի հաղթանակը»,- իր ծրագրերի մասին ասել է գործիչը: Նրա խոսքերով՝ մենք անկախ պետություն ենք ստեղծել, բայց չունենք այդ անկախությունը կերտող քաղաքացին: «Ասում են, թե լիդեր չկա. լիդերներ շատ կան, այլ հարց է, թե մեր հասարակության չափորոշիչները որն են։ Հասարակությունը հոգնած է ու վախկոտ և փնտրում է վախկոտ գործիչների»:
Շանթ Հարությունյանի համար ընտրությունները «թափոն» են: Նա համարում է, որ Հայաստանում իշխանափոխություն կարող է լինել միայն հեղափոխությամբ: Ընտրության չի գնալու, գնացողներին էլ խորհուրդ է տալիս սատարել Պարույր Հայրիկյանին:
