Արդյո՞ք 2011 թվականը լինելու է գնաճային տարի. Այս հարցին այսօր անդրադարձան ազգային վիճակագրական ծառայության գների վիճակագրության և միջազգային համադրումների բաժնի պետ Գուրգեն Մարտիրոսյանը և կառավարման փորձագետ Հարություն Մեսրոպյանը:
Մարտիրոսյանը նշեց, որ ԱՎԾ-ն կանխատեսումներով չի զբաղվում, այլ իրականացնում է հետազոտություններ և ժամանակին իրենք կարձանագրեն փաստը:
Կառավարման փորձագետ Հարություն Մովսիսյանը ասաց, որ Եվրոպայում արդեն իսկ գնաճի արագացում է զգացվել, և, բնականաբար, շուտով կսկսեն մեր գնաճը բացատրել Եվրոպայով, դրան գումարած՝ վառելիքը թանկացել է, և պարզ է, որ այս գործոնով ևս կսկսեն պայմանավորել գնաճը: «Երկու օբյեկտիվ և երկու սուբյեկտիվ գործոն կա: Պետք է հույսով սպասենք՝ ի՞նչ ամառ, և ի՞նչ եղանակ է լինելու, որովհետև, պարզվում է, մեզանում գնաճը վերևից է գալիս: Մյուս օբյեկտիվ պատճառը ամբողջ աշխարհում նկատվող միտումն է՝ կապված էներգակիրների թանկացման հետ»,- ասաց նա և հավելեց, որ Հայաստանը ներկրող երկիր է, և դրսի ցանկացած փոփոխություն մեզանում շատ ուժեղ ազդեցություն է ունենում: Փորձագետը նշեց, որ Հայաստանում հետաքրքիր է մի հանգամանք. եթե դրսում ցանկացած մեկ միավորով գնաճ արձանագրվի, մեզ մոտ էլ կբարձրանա, բայց նվազման դեպքում, միևնույն է, Հայաստանում գները չեն նվազում: Մարտիրոսյանը ասաց, որ Հայաստանի տնտեսությունը մենաշնորհային է, նշեց, որ անհրաժեշտ է ջարդել մենաշնորհը, և եզրակացրեց, որ այս բոլոր գործոնները ընդհանրապես հույս չեն տալիս, որ մեզանում գնաճը կլինի կառավարելի: