Իհարկե, այլընտրանք չկա, բայց պեսիմիստական մոտեցումներով գնալ ընտրությունների՝ «Ազատ դեմոկրատներ» կուսակցության անդամ Ալեքսանդր Արզումանյանը համարում է անընդունելի: «Բոլորը չեն ընդունում գործող իշխանությանը: Ասել, որ իշխանափոխությունն անհնար է, ճիշտ է, բայց ասել, թե վերջին տարիներին ընտրությամբ հնարավոր է իշխանափոխություն անել, ճիշտ չէ: Եթե թեկնածուներից մեկը գտնում է, որ հնարավորություն չունի հաղթելու, պետք է չառաջադրվի»,- «Կենտրոն» հեռուստաընկերության «Ուրվագիծ» հաղորդման եթերում ասել է Ալեքսանդր Արզումանյանը:
Ելքը պետք է ընդդիմությունն առաջարկի, քանի որ, ըստ Արզումանյանի, մարդիկ չեն գնալու ձայն տան իշխանությանը: Չստացվեց միասնական թեկնածուն, բայց ամեն մեկը պետք է ձայնը տա նրան, որ կարող է առաջ տանել, ձայնը չտա ռեժիմին: «Կարծում եմ, հասարակությունը հիմա շատ ավելի պահանջատեր է իր ձայնի նկատմամբ»,- ասել է նա:
ՀԱԿ-ը, նրա խոսքերով, պետք է իր հիմնական թեկնածուներին առաջադրեր, երբ արդեն գիտեր, որ Տեր-Պետրոսյանը չի առաջադրվում: Ալեքսանդր Արզումանյանը նշել է, որ «Ազատ դեմոկրատներ»-ը ձեռքները ծալած չեն նստելու, կսատարեն ընդդիմադիր թեկնածուներից որևէ մեկին: Այս պահին համակրում են ազատական Հրանտ Բագրատյանին. «Մենք «Ժառանգության» հետ ընդհանուր դաշինքով եկել ենք ԱԺ և պայմանավորվածություն կար միասնական շարունակել նախագահական և ավագանու ընտրություններում: Ինչ-ինչ հարցերով այս պահին քննարկումները ակտիվ չեն: Այս պահի դրությամբ Րաֆֆի Հովհաննիսյանի հռետորաբանությունը մոտենում է դաշնակցական-ազգայնական հռետորաբանությանը»:
Ըստ բանախոսի՝ Դաշնակցությունն ուներ հավանաբար թեկնածուի խնդիր. նա ունի հստակ էլեկտորատ, որին փորձում է Րաֆֆի Հովհաննիսյանն իր կողմ բերել: Ընտրություններին չմասնակցող մյուսները ևս ունեն լուրջ էլեկտորատ, և Ալեքսանդր Արզումանյանը կարևորում է, որ չփոշիանան ձայները:
