Ճապոնիայում 13 տարի առաջ սառեցված մոր ձվաբջջից երեխա է ծնվել՝ հաղորդում է RIA Novosti-ն:
2001թ. երբ երեխայի մայրը դեռ դպրոցական էր, բժիշկները նրա մոտ ախտորոշել էին լիմֆոմա հիվանդություն: Բժիշկները աղջկան և նրա ծնողներին զգուշացրել էին, որ բուժման կողմնակի բարդություններից մեկն էլ կարող է լինել անպտղությունը: Մինչև բուժումը սկսելը՝ որոշվել էր վերցնել երկու առողջ ձվաբջիջ և սառեցնել դրանք:
Բուժումը բարեհաջող է անցել, և աղջիկը կարողացել է վերադառնալ իր սովորական կյանքին, իսկ անցյալ տարի նա ամուսնացել է: Արտամարմնային բեղմնավորման մեթոդով պահպանված ձվաբջիջներից մեկը բեղմնավորվել է «սրվակի» մեջ, որից հետո դա փոխպատվաստել են մորը: Երեխան լույս աշխարհ է եկել օգոստոսին:
Չնայած այն հանգամանքին, որ արհեստական բեղմնավորման բնագավառում գրանցվել է մեծ առաջընթաց, 10 տարուց ավելի սառեցված վիճակում մնացած ձվաբջջից երեխայի լույս աշխարհ գալը Ճապոնիայում հազվադեպ երևույթ է:
Պետք է նշել, որ Ճապոնիայում բարձրացել է ամուսնացողների տարիքային շեմը, և այսպես կոչված՝ ծնելիության ծերացման պատճառով ավելի շատ ճապոնուհիներ են երիտասարդ տարիքում սառեցնում իրենց ձվաբջիջները՝ այդպիսով հնարավորություն ունենալով մի քանի տարով և նույնիսկ տասնամյակով զբաղվել իրենց կարիերայով, հոբիով կամ գիտական գործունեությամբ: Իսկ այս ամենից հետո նրանք կարող են, առանց անպտղությունից վախենալու, մտածել երեխա ունենալու մասին: Թերահավատ մարդիկ, սակայն կարծում են, որ այս երևույթը կհանգեցնի նրան, որ կանայք, իրենց ապահովագրված զգալով անպտղության վտանգից, ավելի կմեծացնեն «ծնելիության ծերացումը»:
