Կահիրեի կենտրոնում հարյուրավոր մարդիկ, այդ թվում 2011 թ. հեղափոխության ժամանակ զոհվածների հարազատները, բողոքի ցույց են անցկացրել Եգիպտոսի նախկին նախագահ Հոսնի Մուբարաքի արդարացման դատավճռից հետո: Այս մասին հաղորդում է RIA Novosti-ն:
Այսօր՝ ավելի վաղ, Կահիրեի դատարանը Եգիպտոսի նախկին նախագահ Հոսնի Մուբարաքի և նրա երկու որդիների վրայից հանել է 2011թ. հեղափոխության ժամանակ ցուցարարների վրա կրակ բացելու հրաման տալու մեղադրանքները:
Ցուցարարների հիմնական մասը հավաքվել է Կահիրեի թանգարանի շենքի մոտ: Մարդիկ մեղադրել են երկրի կառավարությանը կողմնակալության մեջ՝ պահանջելով, որպեսզի դատարանն անվավեր ճանաչի իր կայացրած որոշումը:
Կահիրեի ոստիկանության ներկայացուցիչները կոչ են արել ցուցարարներին օրենքը չխախտել և դուրս չգալ խաղաղ բողոքի ակցիայի շրջանակներից: Բացի այդ, Թահրիր հրապարակ տանող բոլոր մուտքերը փակվել են զինվորականների կողմից:
Բացի հիմնական դատավարությունից, որում մեղադրվում էր Մուբարաքը, նախկին ղեկավարին արդարացրել են նաև այլ գործերով: Դրանցից են՝ Իսրայելին իջեցված գներով գազի մատակարարման գործը, ինչպես նաև և կոռուպցիոն գործը, որով Մուբարաքը և նրա որդիներ Գամալը և Ալան մեղադրվում էին զբոսաշրջային Շարմ էլ-Շեյխում վիլաների սեփականաշնորհման մեջ: Այսօր նաև արդարացվել են Եգիպտոսի ներքին գործերի նախկին նախարար Հաբիբ ալ-Ադլին և նրա վեց օգնականները, որոնք Մուբարաքի հետ հանդիսանում էին ցուցարարների սպանության գործով մեղադրյալներ:
Մուբարաքը և Եգիպտոսի նախկին ներքին գործերի նախարար Հաբիբ ալ-Ադլին 2012 թ. հուլիսի 2-ին Կահիրեի քրեական դատարանի կողմից դատապարտվել էին ցմահ ազատազրկման: Սակայն 2013 թ. հունվարին Եգիպտոսի վերաքննիչ դատարանը բավարարեց նախկին նախագահի փաստաբանի դիմումը և նոր լսումներ նշանակեց:
Եգիպտոսի գերագույն դատախազությունն արդեն սկսել է դատարանի որոշման օրինականության քննությունը և մտադիր է բողոքարկել այդ որոշումը:
Այնուամնենայնիվ նախկին նախագահը չնայած արդարացնող որոշմանը, չի ազատվում բանտարկությունից, քանի որ մեղադրվում է նաև «դղյակների» գործով:
Հիշեցնենք, Եգիպտոսի նախկին նախագահին անցյալ տարի Տորայի բանտից տեղափոխել են Կահիրեի ռազմական հիվանդանոց՝ տնային կալանքի:
