Քննիչ Ստանելի Կարաջովային հեռացրել են աշխատանքից Բուլղարիայի Բուրգաս քաղաքում վեց մարդու մահվան պատճառ դարձած ահաբեկչության վերաբերյալ գաղտնի տեղեկատվության հրապարակման պատճառով: Այս մասին տեղեկացրել է Novinite տեղեկատվական պորտալը:
Իսրայելցի զբոսաշրջիկների ավտոբուսն անցած տարվա հուլիսի 18-ին պայթեցվել էր Բուրգասի օդանավակայանում: Ավելի քան 30 մարդ վնասվածքներ էր ստացել:
Կարաջովային աշխատանքից հեռացրել են հունվարի 3-ին, նույն օրը, երբ նա բուլղարական 24 часа թերթին տրված հարցազրույցում տեղեկացրել էր, որ ոստիկանությունը հաստատել է ահաբեկիչ-մահապարտի անձը: Բուլղարիայի ՆԳ նախարարությունը պաշտոնական մեկնաբանություններ անելուց հրաժարվել է:
Ավելի վաղ Բուլղարիայի ՆԳ նախարար Ցվետան Ցվետանովը հայտարարել էր, որ ահաբեկչին օգնել են ավելի քան երեք հանցակիցներ: Բոլոր երեքն էլ Բուլղարիայում կեղծ փաստաթղթեր են օգտագործել՝ վարորդական իրավունքներ, որոնք պատրաստվել են ամերիկյան Միչիգան նահանգում:
