Ռուսամետ անջատողականները նոյեմբերի 2-ին Ուկրաինայի հարավարևելյան՝ իրենց վերահսկողության տակ գտնվող շրջաններում ընտրություններ անցկացրին: Արևմտյան համայնքը հրաժարվում է այս շրջաններում անցկացված միջոցառումները դիտարկել որպես օրինական կամարտահայտման դրսևորում: Արևմտյան գործիչների պնդմամբ՝ անջատողականները խախտում են մինսկյան պայմանավորվածությունները: Եվրոպական միությունը դատապարտում է Ուկրաինայի հարավարևելյան շրջաններում երեկ անցկացված ընտրությունները և դրանք համարում խոչընդոտ խաղաղության հասնելու ճանապարհին։ Եվրամիության արտաքին քաղաքականության հարցերով բարձր ներկայացուցիչ Ֆեդերիկա Մոգերինին Դոնեցկում և Լուգանսկում տեղի ունեցած ընտրությունները ոչ անօրինական է որակել, Ուկրաինայի նախագահ Պյոտր Պորոշենկոն դրանք ֆարս է անվանել։ Ռուսաստանի արտգործնախարարությունը, մինչդեռ, հայտարարել է, որ հարգում է Ուկրաինայի հարավ-արևելքում ապրող ժողովրդի ընտրությունը։
«Առաջին լրատվական»-ի հետ զրույցում Ուկրաինայի Լուգանսկի և Դոնեցկի մարզերի հոգևոր հովիվ տեր Հուսիկ Նուրիջանյանն ասաց, որ այս շրջաններում հայ համայնքին պետք չէ ընդհանուր դիտարկել, քանի որ յուրաքանչյուր բնակիչ իր տեսակետն ու մոտեցումն ունի տեղի ունեցող քաղաքական զարգացումների վերաբերյալ: Յուրաքանչյուրն իր մտածելակերպի համաձայն էլ վարվել է: «Մի մասը գնացել, քվեարկել է, մի մասը չի գնացել. իրենց ցանկությամբ, սա պարտադրված չէր: Այս խառը իրավիճակում դեռևս որևէ կողմնորոշում չունի համայնքն ամբողջությամբ վերցրած: Դեռևս չգիտենք, թե ինչ կլինի վաղը»,- ասաց տեր Հուսիկը:
Նա նաև նշեց, որ Ուկրաինայի հարավ-արևելքի որոշ հատվածներում հայ համայնքը հարմարվել է տիրող իրավիճակին, որոշումներին՝ չունենալով այլ ելք և լինելով հյուրի կարգավիճակում:
«Այն տարածքում, որը Դոնեցկի Հանրապետություն է դարձել, հայ ժողովուրդը, տեսնելով այն, ինչ կատարվում է, Դոնեցկի կողմնակիցն է, բայց նրանց շրջանում կան նաև այնպիսիք , ովքեր կցանկանային, որ ամեն ինչ մնար այնպես, ինչպես մինչ այսօր: Այլ ելք չունենալով՝ մարդիկ հարմարվում են, քանի որ մենք ինչ էլ որ ցանկանանք անել, հյուր ենք այս երկրում և հյուր լինելով՝ պետք է ապրենք ինչպես իրենց օրենքներն են, ինչպես իրենք են որոշում, որովհետև մենք քաղաքական հարց չենք կարող լուծել: Մենք պետք է հարմարվենք որոշումներին: Եթե չենք ցանկանում, պետք է դուրս գանք այս երկրից կամ մնանք ու հարմարվենք իրենց օրենքներին»,- մանրամասնեց հայ քահանան:
Հիշեցնենք, որ անօրինական համարվող ընտրություններում «ԴԺՀ»-ի ղեկավարի պաշտոնին հավակնում էր երեք թեկնածու, այդ թվում՝ ներկայիս «վարչապետ» Ալեքսանդր Զախարչենկոն, ինչպես նաև տարածաշրջանում հայտնի ուժային Յուրի Սիվոկոնենկոն ու «Նովոռոսիայի միասնական խորհրդարանի» փոխխոսնակ Ալեքսանդր Կոֆմանը: «ԼԺՀ»-ի ղեկավարի պաշտոնի համար պայքարեցին չորս թեկնածու, այդ թվում՝ ներկայիս ղեկավար Իգոր Պլոտնիցկին:
