Թուրքական Akşam թերթի փոխանցմամբ, վարչապետ Էրդողանը Բնապահպանության նախարարության կազմակերպած միջոցառմանը մասնակցելուց հետո հայտարարել է մահապատժի վերականգնման հնարավորության մասին. «Այդ հարցը մեր օրակարգում չէ, սակայն այն քննարկվում է»:
Նշվում է, որ մահապատժին վերադառնալու անհրաժեշտության լուրերը Թուրքիայում շրջանառության մեջ դրվեցին այն ժամանակ, երբ 1.5 տարի առաջ նախագահ Աբդուլլահ Գյուլի հայրենի Քայսերի քաղաքում գրանցվեց 3 երեխաների բռնաբարության ու սպանության դեպք:
Հիշեցնենք, որ Թուրքիայում մահապատիժը (կախաղան բարձրացնելը) վերջնականապես վերացվել է Էրդողանի գլխավորած «Արդարություն ու զարգացում» կուսակցության (ԱԶԿ) ժամանակաշրջանում` 2006 թվականին (թիվ 5218 օրենքի հիման վրա):
Չնայած դրան` վերջին մահապատիժն ի կատար է ածվել 1984 հոկտեմբերի 25-ին: Դրանից հետո կայացված մահապատժի վճիռները, չհաստատվելով թուրքական խորհրդարանի կողմից, ի կատար չեն ածվել: Ավելին, 1991 թվականին մահվան դատավճիռ ունեցող 500 բանտարկյալների պատժաչափը նվազեցվեց մինչև 10 տարի ազատազրկման:
1990-ական թվականներին կայացված մահապատժի դատավճիռներից ամենահայտնին գրանցվեց 1999 թվականի հունիսի 29-ին, երբ «նման բախտի» արժանացավ քուրդ առաջնորդ Աբդուլլահ Օջալանը: Նոյեմբերի 25-ին Թուրքիայի Գերագույն դատարանը ԵՄ-ի ճնշման տակ բեկանեց այդ վճիռը:
1920-1984 թվականներին Թուրքիայում իրականացվել է 712 մահապատիժ, որոնցից 15-ը վերաբերել է կանանց: Միևնույն ժամանակ, թուրքական դատարանների կողմից կայացված և խորհրդարանի կողմից չհաստատված մահապատիժների քանակը տատանվում է 1500-2000-ի միջև: Մահապատիժները կիրառվել են 18-65 տարեկանների հանդեպ:
Թուրքիայում վերջին մահապատժի ենթարկվածների թվում է նաև ASALA-ի (Հայաստանի ազատագրության հայ գաղտնի բանակ) հերոսներից Լևոն Էքմեքչյանը` 1983 թվականի հունվարի 28-ին, Անկարայում:
Նա «Խրիմյան Հայրիկ անձնասպանական ջոկատի» կազմում 1982 թվականի օգոստոսի 7-ին մասնակցեց Անկարայի «Էսենբողա» օդանավակայանի գրավմանը («Կարին» գործողություն), որի ընթացքում պատանդ վերցվեց 250 ուղևոր:
Երբ թուրքական իշխանությունները օդանավակայան տարան հայ հոգևորականներին ու քաղաքացիական անձանց, որպեսզի նրանք ջոկատի անդամներին հորդորեին անձնատուր լինել, նրանց պատասխանեցին. «Մենք ահաբեկիչներ չենք, այլ հայրենիքի ազատագրության ֆիդայիներ՝ պատրաստ մեր կյանքը տալու հայ ժողովրդի ապագայի համար»:
Դրանից հետո թուրքական զորքերը ներխուժեցին օդանավակայանի շենք, ինչի ժամանակ էլ վիրավորվեց և ուշագնաց վիճակում գերի ընկավ Լևոն Էքմեքչյանը:
