«Բռնի կուսակցականացումը վաղուց անցած էտապ է Հայաստանի քաղաքական համակարգի համար և դրա քաղաքական տրամաբանությունը ես չեմ հասկանում: Դրա քաղաքական շահը ՀՀԿ-ն չի տեսնում»,- հայտարարեց ԿԳ նախարար Արմեն Աշոտյանը՝ անդրադառնալով այն լուրերին, թե Գեղարքունիքի և Լոռու մարզերի դպրոցների ուսուցիչներին և տնօրեններին ստիպում են դառնալ ՀՀԿ անդամ:
Աշոտյանի գնահատմամբ, եթե ինչ-որ մեկը, ասենք, իր «խաթեր» ստիպված դառնա ՀՀԿ անդամ, ապա հետո հաստատ չի ընտրելու այդ կուսակցությանը:
Անդրադառնալով Նուբարաշենի թիվ 18 հատուկ դպրոցը «Փոքր Մհեր» կրթահամալիրին միացնելու խնդրի շուրջ կառավարության նիստի ընթացքում իր այն հայտարարությանը, թե եթե այդ դպրոցի աշխատակազմը շարունակի շահարկումները, ինքը կանի նաև քաղաքական հայտարարություններ՝ Աշոտյանը ասաց. «Վերջին երկու տարիներին հազիվ եմ ինձ զսպում, որ քաղաքական որևէ մեկնաբանություն չանեմ, ու էլի եմ ինձ զսպում: Խնդիրները դեռ ընթացքի մեջ են, և ես դեռ չեմ պատրաստվում հայտարարություն անել, կարծում եմ, որ մենք իրար հասկացանք` ես և այն մարդիկ, ում որ ուղղված էր կառավարության նիստի ժամանակ արած իմ հայտարարությունը»:
