Ղրիմի հայ համայնքի ազգային համագումարը որոշում է կայացրել Ղրիմում ստեղծել տարածաշրջանային ազգային-մշակութային ինքնավարություն:
«Տարածաշրջանային ազգային-մշակութային ինքնավարությունը, ՌԴ օրենքներին համապատասխան, կգրանցվի արդարադատության նախարարությունում՝ դեկտեմբերի 13-ին»,- RIA Novosti-ին հայտնել է Ղրիմի հայ համայնքի ղեկավար Վաղաշակ Մելքոնյանը:
Նա նշել է, որ նոր տարածաշրջանային միավորման մեջ կներառվեն հայերի 17 տեղական ազգային-մշակութային ինքնավարություններ: Նրա խոսքով՝ նման ինքնավարության ստեղծումը, ի տարբերություն հասարակական կազմակերպության կարգավիճակի, թույլ կտա հայերին հանրապետական ու պետական բյուջեից հավակնել մշակույթի պահպանման ծրագրերի, ազգային լեզվի, պատմական ժառանգության ֆինանսավորման:
«Արդեն ստեղծվել են ազգային-մշակութային ինքնավարություններ Յալթայում, Թեոդոսիայում, Կերչում, մնացածները ձևավորման փուլում են: Մենք ունենք Ղրիմի հայ համայնքի 17 բաժանմունք ու որոշել ենք, որ բոլոր 17-ը մինչև տարեվերջ մտնեն ռուսական դաշտ՝ քաղաքային ազգային-մշակութային ինքնավարության տեսքով»,- ասել է Մելքոնյանը:
Վերջինիս տվյալներով՝ Ղրիմում ապրում է 15-20 հազար հայ:
