NASA-ի ուսումնասիրողները ապագայում ծրագրում են 500 տոննա կշռող աստերոիդ զավթել, այն տեղադրել մերձլուսնային ուղեծրում և այնտեղ տիեզերական կայան կառուցել, որը Երկիր-Մարս ճանապարհին անցումային կետ կդառնա:
Ծրագիրը մոտակա ժամանակներս կքննարկվի ԱՄՆ-ի Գիտության և տեխնոլոգիաների քաղաքականության դեպարտամենտի կողմից:
Նախնական գնահատականներով՝ այն միայն սկզբնական փուլում (առաջին 10 տարիներին) պետությանը 2,6 միլիարդ դոլար կարժենա: Համապատասխան տեխնիկա-տնտեսական հիմնավորումները մշակվել են NASA-ի մասնագետների և Կալիֆոռնիայի տեխնոլոգիական ինստիտուտի կողմից:
Եթե գիտնականներին հաջողվի իրականացնել այդ ծրագիրը, ապա դա պատմության մեջ կդառնա տիեզերական օբյեկտի առաջին տեղափոխումը մեկ ուղեծրից մյուսը:
Հատուկ «զավթիչ պարկուճը» տիեզերք բաց կթողնվի «Ատլաս-5» հրթիռի օգնությամբ: Այն պահին, երբ աստերոիդը բավականաչափ մոտենա, պարկուճը բաց կթողնի յուրօրինակ «պայուսակը», որն էլ իր հերթին կփաթաթվի աստերոիդի շուրջը:
Այնուհետև սարքավորումը կաշխատեցնի հզոր շարժիչը և, կանգնեցնելով աստերոիդը, կտեղադրի այն չեզոք վայրում: Դրանից հետո հնարավոր կլինի իրականացնել Տիեզերքի խորքերը սարքավորումներ բաց թողնելու համար նախատեսված բազայի կառուցումը:
Գիտնականները նշում են, որ տիեզերական օբյեկտը զավթելու ծրագիրը հնարավորություն կտա կայանի կառուցման համար մետաղներ և հանքանյութեր ձեռք բերել:
