Չեմ կարծում, որ ԲՀԿ-ն կտրել է իր կապն իշխանության հետ: Այսօր լրագրողների հետ զրույցում այս մասին ասաց ՀՀ ԱԺ պատգամավոր, «Ժառանգություն» կուսակցության ներկայացուցիչ Զարուհի Փոստանջյանը՝ անդրադառնալով ներքաղաքական զարգացումներին:
Հարցին, թե ե՞րբ «Ժառանգությունը» կլքի եռյակը, եթե պարզվի, որ եռյակում կան նախագահի մի քանի թեկնածուներ, պատասխանեց, որ «Ժառանգությունը» չի ենթադրել, նկատի չի ունեցել, որ մասնակցում է ալյանսային գործընթացի: «Մենք ներգրավվել ենք, որպեսզի համակարգային փոփոխություն տեղի ունենա, այն իշխանությունը, որը բռնազավթած է պահում մեր ժողովրդի քվեն, պետք է հեռանա: Հարթակն ու ժողովուրդը պետք է համատեղ գործողություն իրականացնեն՝ ամբողջական իշխանափոխություն: Հարթակում կմնան այն մարդիկ, որոնք գնում են այդ պահանջի իրացմանը՝ համակարգի փոփոխություն և բռնազավթած իշխանության հեռացում»,- ասաց բանախոսը:
Անդրադառնալով Դաշնակցության քաղաքականությանը՝ նշեց, որ այն քաղաքական ուժերը, ովքեր կապ են ունեցել գործող ռեժիմի հետ, պետք է վիրահատական միջամտությամբ կապը խզեն հանցավոր ռեժիմից: «ՀՅԴ-ն պետք է ուժ գտնի այդ վիրահատական քայլին գնալու համար»,- ասաց նա:
Հարցին ի պատասխան, թե ինքը և Րաֆֆի Հովհաննիսյանը ինչպե՞ս են ընդունել ջղաձգվողների վերաբերյալ Տեր-Պետրոսյանի դիտարկումները՝ Փոստանջյանն ասաց, որ վիրավորողին սովորաբար ընդունում են որպես բարոյազուրկ մարդու:
Մեկ այլ դիտարկմանը, թե Լևոն Տեր-Պետրոսյանը հայտարարեց, որ ընդդիմության լիդերներն են որոշելու հաջորդ հանրահավաքի օրակարգը, իր մշակած օրակարգը կարո՞ղ է ազդել այդ օրակարգի վրա, և ԲՀԿ-ն արդեն կտրե՞լ է իր կապն իշխանության հետ, արձագանքեց՝ ասելով, որ չի համարում, թե ԲՀԿ-ն կտրել է իր կապը իշխանության հետ: Նրա համոզմամբ՝ որպեսզի ԲՀԿ-ն իր կապը կտրի, պետք է այդ գործողությունների մեջ ներգրավված լինի:
«Ես ասեմ, որ դա ավտորիտար բնույթի հայտարարություն է, որը բնորոշ է Լևոն Տեր-Պետրոսյանին»,- ասաց Փոստանջյանը՝ շարունակելով, որ Լևոն Տեր-Պետրոսյանի ելույթը համաձայնեցված չէր մյուս կազմակերպիչների հետ:
