Այսօր՝ երեկոյան ժամը 18-ին «Օջախ» ռեստորանում մեկնարկել է Հայաստանի Օլիմպիական կոմիտեի ամենամյա միջոցառումը: «Առաջին լրատվական»-ի տեղեկություններով` հանդիպմանը մասնակցելու են ԲՀԿ առաջնորդ, Հայաստանի Օլիմպիական կոմիտեի նախագահ Գագիկ Ծառուկյանն ու Սերժ Սարգսյանը: Անցյալ տարի հանդիպմանը մասնակցում էր նաև Ռոբերտ Քոչարյանը, և երկու նախագահներն էլ ադամանդակուռ շղթայով հովազներ նվեր ստացան Գագիկ Ծառուկյանից:
Ռոբերտ Քոչարյանի մամլո խոսնակ Վիկտոր Սողոմոնյանից հետաքրքրվեցինք, թե Քոչարյանը հրավիրվա՞ծ է «Օջախի» միջոցառմանը: «Պարոն Քոչարյանը հանրապետությունում չէ, այդ պատճառով չի մասնակցելու»,- ի պատասխան ասաց Սողոմոնյանը: Մեր հստակեցմանը, թե Ռոբերտ Քոչարյանը հրավեր ստացե՞լ է, Սողոմոնյանը պատասխանեց. «Ես ճիշտն ասած չգիտեմ, չեմ հարցրել իրեն: Ենթադրում եմ, որ հրավիրված է, բայց քանի որ հանրապետությունում չէ և վաղուց, այնպես որ՝ չի մասնակցելու»: Թե ուր է գնացել Քոչարյանը, խոսնակը չասաց` պատճառաբանելով, թե «մասնավոր այց է»:
Երկրորդ նախագահի մամլո խոսնակին հարցրինք նաև՝ Ռոբերտ Քոչարյանն ունի՞ որոշում նախագահական ընտրությունների, մասնավորապես առաջադրման հետ կապված: Վիկտոր Սողոմոնյանն ասաց, որ Ռոբերտ Քոչարյանն առաջիկայում անդրադառնալու է ներքաղաքական իրավիճակին, զարգացումներին: « Այդ ժամանակ էլ, կարծում եմ, ամեն ինչ կիմանաք »:
Հարցին՝ հնարավո՞ր է Ռոբերտ Քոչարյանը սատարի Սերժ Սարգսյանին, Սողոմոնյանը հրաժարվեց պատասխանել. «Ես այլևս ոչինչ չեմ կարող ասել»:
