Երևանի քաղաքապետ Կարեն Կարեպատյանը հանդիպել է ՄԱԿ–ի մանկական հիմնադրամի (UNICEF) հայաստանյան ներկայացուցիչ Լեյլի Մոշիրիին և ՀՀ–ում Սլովակիայի Հանրապետության պատվավոր հյուպատոս Գագիկ Մարտիրոսյանին։
UNICEF–ի հայաստանյան ներկայացուցիչը քաղաքապետին է ներկայացրել Հայաստանում ՄԱԿ–ի մանկական հիմնադրամի գործունեության հիմանական ուղությունները։ «Մենք բարձր ենք գնահատում Ձեր ներգրավվածությունն ու ջանքերը, որ գործադրում եք երեխաների կրթության , դաստիարակության պայմանները բարելավելու ուղղությամբ։ Հատկապես ուրախալի է մանկապարտեզներն անվճար դարձնելու մասին վերջերս Ձեր կայացրած որոշումը»,– նշել է UNICEF–ի հայաստանյան ներկայացուցիչն ավելացնելով, որ կարևոր և ողջունելի են նաև նման գործընթացներին գործարար շրջանակներին մասնակից դարձնելու մոտեցումը։
Կարեն Կարապետյանը հյուրերին ներկայացրել է UNICEF–ի հայաստանյան գործունեության շրջանակներում հնարավոր համագործակցության եզրերը, նշելով, որ քաղաքապետարանը, մասնավորապես, ակնկալում է խորհրդատվական աջակցություն առողջապահության և կրթության ոլորտների կառավարման բնագավառում։ «Բիզնեսի ներգրավումը քաղաքային տնտեսության կառավարման որոշ ոլորտներում կբերի նրան, որ բյուջեի ազատված միջոցները կուղղվեն սոցիալական տարբեր ծրագրերի իրագործմանը»,– նշել է Կարեն Կարապետյանը։
ՀՀ–ում Սլովակիայի Հանրապետության պատվավոր հյուպատոս Գագիկ Մարտիրոսյանը նշել է, որ առաջին անգամն է, որ համայնքի ղեկավարությունն ինքն է UNICEF–ի հետ գործակցության նախաձեռնություն հանդես բերում։
Ձեռքբերված պայմանավորվածության համաձայն՝ «Մաքուր ջուր» ընկերությունը, UNICEF–ի աջակցությամբ, սոցիալական ծրագիր կիրականացնի Երևանի քաղաքապետարանի ենթակայության ծննդատներում։
Երևանի քաղաքապետարան
