Սերբիայի կառավարության հարթակը պետք է պատրաստ լինի մինչև 2013թ. հունվարի 10-ը ինքնահռչակ Կոսովոյի հանրապետության հետ երկխոսության համար: Ինչպես հաղորդում է ITAR-TASS-ը, նման հայտարարությամբ հանդես է եկել երկրի նախագահ Տոմիսլավ Նիկոլիչը Բոսնիա և Հերցեգովինա կատարած այցի ընթացքում:
«Մենք փաստաթղթի վերջնական տեքստը պետք է ընդունենք մինչև հունվարի 10-ը, քանի որ այդ օրը նախատեսվում է անցկացնել երկխոսության հերթական փուլը Պրիշտինայի հետ»,- ընդգծել է Նիկոլիչը:
Նախագահն ասել է, որ հարթակը նախատեսում է Կոսովոյում ստեղծել «մի քանի սերբական միություններ» ազգային, այլ ոչ թե տարածքային հիմքով:
Նիկոլիչի կարծիքով`Սերբիայի խորհրդարանի կողմից հարթակի ընդունումը և հաստատումը թույլ կտա Բելգրադին վերջնական դիրքորոշում զբաղեցնել Պրիշտինայի հետ երկխոսությունում: Նախագահի խոսքերով` Սերբիան այլևս չի կարող զբաղեցնել այնպիսի դիրքորոշում, որտեղ միշտ ստիպված է կատարել ալբանական կողմի և միջազգային հանրության պահանջները և դրա փոխարեն ոչինչ չստանալ:
«Մենք հստակ կձևակերպենք, թե ինչի ենք ցանկանում հասնել և այս հիմքով կհասնենք փոխզիջման»,- խոստացել է նախագահը:
