Այսօր ամերիկյան Վեբսթեր քաղաքում հրշեջների վրա կրակ բացած տղամարդը վնասազերծվել է: Այս մասին տեղեկացրել են տեղական իրավապահ մարմինները՝ չմանրամասնելով, թե արդյոք նա սպանվել է ոստիկաննե՞րի կողմից, թե՞ ինքնասպան է եղել:
Դեպքը տեղի է ունեցել տեղական ժամանակով առավոտյան ժամը 6-ին: Անհայտ տղամարդը կրակ է բացել հրշեջների վրա, երբ նրանք ժամանել են Օնտարիո լճի մոտ տներից մեկում բռնկված հրդեհը մարելու: Արդյունքում երկու հրշեջներ սպանվել են, երկուսն էլ վիրավորվել են: Տուժել է նաև մեկ ոստիկան:
Հրաձգության մասին հաղորդագրությունից հետո դեպքի վայր են ժամանել ոստիկանական հատուկջոկատայինները: Անվտանգության նկատառումներով էվակուացվել են մերձակա տների բնակիչները: Հրշեջները կարողացել են հանգցնել հրդեհը միայն հանցագործին չեզոքացնելուց հետո: Կրակը ոչնչացրել է չորս տուն, իսկ երեք շինություններ էլ վնասվել են:
Ոստիկանների խոսքերով՝ չարագործը, հնարավոր է, ինքն է հրդեհել տունը, որպեսզի հրշեջներին թակարդը գցի: