Грузия Online-ի փոխանցմամբ՝ Վրաստանի վարչապետ Բիձինա Իվանիշվիլին այսօր Թբիլիսիում կազմակերպված մամուլի ասուլիսի ժամանակ անդրադարձել է ռուս-վրացական հարաբերությունների կարգավորման խնդրին.
«Եթե անգամ ռուսական քաղաքական ղեկավարությունը հրաժարվի Աբխազիայի ու այսպես կոչված Հարավային Օսիայի անկախության ճանաչումից, ապա բուն գործընթացը (տարածքային ամբողջականության վերականգնումը) հեշտ չի լինելու: Ռուսաստանի հետ հարաբերություններում մենք կլինենք կառուցողական ու սկզբունքային: Մենք ողջունում ենք ռուսական կողմի դրական հայտարարություններն ու քայլերը:
Շատ դժվար է վերլուծել, թե ինչպես կզարգանա իրավիճակը: Մենք համբերատար ենք գտնվելու: Ներկայումս երկու երկրներն այնպիսի վիճակում են, որ այն կարելի է անվանել փակուղի: Ես տրամադրված եմ լավատեսորեն, թեև մենք չենք սպասում, թե ամեն ինչ կկատարվի շատ արագ՝ չնայած ոչինչ բացառել չի կարելի: Մենք պատրաստվում ենք քայլ առ քայլ հաստատել ու բարելավել լավ հարաբերություններ մեր մեծ հարևանի հետ»:
