Եվրասիական միության և Եվրամիության շրջանակներում ՀՀ որդեգրած քաղաքականությունը հակասություններ չի հարուցում. սա արտաքին քաղաքականության առաջնահերթություններից է: Այսօր լրագրողների հետ հանդիպման ընթացքում նման կարծիք հայտնեց ԱԺ ՀՀԿ պատգամավոր, արտաքին հանձնաժողովի նախագահ Արտակ Զաքարյանը՝ պատասխանելով այն հարցին, թե ի վերջո` Եվրասիակա՞ն միությանը, թե՞ Եվրամիությանն ինտեգրվելն է ավելի ձեռնտու Հայաստանին:
«Մենք առաջնորդվելու ենք մեր պետության շահերով: Հակասություններ փնտրել պետք չէ, եթե կամ-կամի խնդիր լինի, այդ դեպքում պետք է գերակշռեն ազգային պետական շահերը: Միջազգային բոլոր շրջանակները հստակ գնահատում և ընկալում են ամեն ինչ, իսկ մենք պետք է միանշանակ առաջնորդվենք մեր պետության շահերով: Հայաստանի համար ցանկացած ինտեգրման գործընթաց շահավետ է՝ տնտեսության աշխուժության առումով»:
Անդրադառնալով այն դիտարկմանը, թե այժմ հայ-թուրքական արձանագրություններն արխիվ են ուղարկվել, և միակ քննարկվող հարցն այսօր Ղարաբաղյան հակամարտությունն է՝ Ա. Զաքարյանն ասաց. «Հայ-թուրքական հարաբերություններն արխիվ ուղարկել պետք չէ, բայց առայժմ Թուրքիան իր քաղաքականությունը պայմանավորում է երրորդ երկրի քաղաքականությամբ: Այս հարցը քննարկման փուլում է, և բացառվում է, որ այն մոռացության մատնվի: Ցեղասպանության ճանաչման հարցը մնում է Հայաստանի Հանրապետության առաջնահերթ հարցերից մեկը»,- ասաց պատգամավորը:
Խոսելով Լեռնային Ղարաբաղի հիմնահարցի խաղաղ կարգավորման մասին` Արտակ Զաքարյանն ասաց, որ այս հարցում մենք ունենք ձեռքբերումներ. «Մեզ հաջողվել է տարբեր քաղաքական շրջանակներում ապահովել խնդրի ընկալումն այնպես, ինչպես կա: Միաժամանակ ամրագրել ենք այն ընկալումը, որ Հայաստանը տարածաշրջանի խաղաղ քաղաքականության երաշխավոր է, իսկ Ադրբեջանը՝ սպառնալիք: Եթե Ադրբեջանն այսօր ստանձնել է նավթ և գազ վաճառող պետության դեր, ապա ժամանակի ընթացքում այն սպառվելու է: Ի տարբերություն Հայաստանի` Ադրբեջանը` իր ռազմական քաղաքականությամբ, միջազգային քաղաքականության կողմից համարվում է սպառնալիք»,- իր խոսքը եզրափակեց Ա. Զաքարյանը:
