««Անսար ադ-դին» («կրոնի պաշտպաններ») արմատական խմբավորման իսլամականները, ովքեր սերտորեն համագործակցում են «Ալ Քաիդա» խմբավորման հետ իսլամական Մահրիբի երկրներում», այսօր Թիմբուկթու քաղաքում ձեռնամուխ են եղել մնացած մուսուլմանական սրբավայրերի ոչնչացմանը: Այս մասին հայտարարել է ծայրահեղականների ներկայացուցիչ Աբու Դարդարը:
«Թիմբուկթուում ոչ մի դամբարան չի մնա: Ալլահին նրանք դուր չեն գալիս: Մենք պատրաստվում ենք հողին հավասարեցնել բոլոր մնացած սրբավայրերը»,- հայտարարել է Դարդարը: Ականատեսների վկայությունների համաձայն՝ իսլամականներն «Ալլահը հզոր է» գոչյուններով ավերում են սրբերի գերեզմանները:
Թիմբուկթուն հիմնադրվել է ХI դարում Մարրոկոյից Արևմտյան Սուդան տանող ճանապարհին և մինչև ХХ դարը հանդիսացել է առևտրային կարևորագույն հանգույց և հյուսիս-արևմտյան Աֆրիկայի մշակութային կենտրոն: Այնտեղի 333 դամբարաններից 16-ը համարվում են ՅՈՒՆԵՍԿՕ-ի համաշխարհային ժառանգություն:
Սա ծայրահեղականների կողմից վանդալիզմի դրսևորման առաջին դեպքը չէ: Գարնանը նրանք այրել են եկեղեցիներից մեկը և թալանել են 1973թ-ին հիմնադրված Ահմեդ Բաբի անվան արխիվային նյութերի հավաքագրման և ուսումնասիրության կենտրոնը: Մալիի մշակույթի նախարարության տվյալներով՝ կենտրոնի գրադարանում պահվում էր 60-100 հազար ձեռագիր մատյան: «Անսար ադ-դին» («կրոնի պաշտպաններ») արմատական խմբավորումն ամռանը 3 եկեղեցի է հողին հավասարեցրել` խոստանալով ժամանակի ընթացքում վերացնել բոլոր սրբավայրերը:
Հոկտեմբերին` Բամակոյում կայանալիք համաշխարհային համաժողովի նախօրեին, որը նվիրված էր Մալիի հյուսիսային հատված օտարերկրացի զինվորականներ ուղարկելուն` նպատակ ունենալով վերականգնել երկրի տարածքային ամբողջականությունը, իսլամականները վերսկսեցին իրենց ապակառուցողական գործունեությունը:
ՄԱԿ-ի Անվտանգության խորհուրդը հավանության է արժանացրել բանաձևը` թույլատրելու 2013 թ-ի սեպտեմբերին 3,3 հազար մարդու տեղակայումը Մալիում` երկրի հյուսիսը ծայրահեղականներից ազատագրելու նպատակով: Գործողությունների իրականացումը մոտ 1 տարի կտևի: Անվտանգության խորհուրդը ՄԱԿ-ի անդամ պետություններին և միջազգային կազմակերպություններին կոչ է արել ֆինանսական և բարոյական աջակցություն ցուցաբերել առաքելությանը, որը կնպաստի Մալիի ռազմական կարողության և անվտանգության ուժերի վերականգնմանը:
Մալիում հակամարտությունը սկսվել է մարտի կեսերին, երբ Բամակոյում սկսվեց զինված ապստամբություն: Իրավիճակից օգտվեցին ծայրահեղականները և արագ իրենց ազդեցության տակ վերցրին երկրի հյուսիսը:
